నవపక్షం, కొమురం భీం ఆసిఫాబాద్ జిల్లా ప్రతినిధి:
ఉత్తమ ఆశ వర్కర్‌గా కొమురం భీం ఆసిఫాబాద్ జిల్లా సిర్పూర్(టీ) మండల కేంద్రంలోని ఎస్టీ కాలనీకి చెందిన మానేపల్లి నిర్మల ఎంపికయ్యారు. లోనవెల్లి (పీహెచ్‌సీ) ఆశ వర్కర్‌గా పనిచేస్తున్న ఆమె సేవలను గుర్తించి ఈ ఎంపిక చేశారు. ఈ సందర్భంగా వైద్య సిబ్బంది నిర్మలను సన్మానించి అభినందించారు. గ్రామాల్లో ప్రజలకు ఆరోగ్యంపై అవగాహన కల్పిస్తూ నిర్మల సేవలందిస్తున్నారు. గర్భిణులు, బాలింతలు, చిన్నారుల ఆరోగ్యంపై శ్రద్ధ చూపడంతోపాటు అవసరమైన వారికి వైద్య సేవలు అందేలా పీహెచ్‌సీ సిబ్బందితో సమన్వయం చేస్తున్నారు. అనంతరం ఆశవర్కర్ నిర్మల మాట్లాడుతూ ఉత్తమ ఆశ వర్కర్‌గా ఎంపికై సన్మానం పొందడం సంతోషంగా ఉందన్నారు. ఈ గుర్తింపు మరింత బాధ్యతను పెంచిందని, ఇకపై కూడా ప్రజలకు అందుబాటులో ఉంటూ సేవలందిస్తానని తెలిపారు. నిర్మలకు కుటుంబ సభ్యులు, స్థానికులు, ఆరోగ్య సిబ్బంది శుభాకాంక్షలు తెలిపారు.
