నవపక్షం, యాదాద్రి భువనగిరి జిల్లా, ఆగస్టు 31:
BC, SC, ST-JAC మరియు DSP సంయుక్త ఆధ్వర్యంలో జిల్లా ప్రెసిడెంట్ ఎర్రోళ్ల శాంతికుమార్ నేతృత్వంలో యాదాద్రి భువనగిరి జిల్లా కలెక్టర్ కి వినతి పత్రం అందజేశారు.
ఈ సందర్భంగా BC, SC, ST-JAC రాష్ట్ర వైస్ ప్రెసిడెంట్ రాసాల వినోద్ యాదవ్ మాట్లాడుతూ తెలంగాణ రాష్ట్రంలో సుమారు 30 లక్షల మంది విద్యార్థులకు సంబంధించిన దాదాపు రూ.14 వేల కోట్ల ఫీజు రీయింబర్స్మెంట్ బకాయిలు ప్రభుత్వం వద్ద పెండింగ్లో ఉన్నాయని తెలిపారు. బకాయిలు విడుదల కాకపోవడంతో ముఖ్యంగా BC, SC, ST వర్గాలకు చెందిన పేద విద్యార్థులు కళాశాలల్లో తమ చదువులను కొనసాగించేందుకు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు.
ఫీజు రీయింబర్స్మెంట్ బకాయిలు ఆలస్యం కావడం వల్ల విద్యార్థుల చదువులకు తీవ్ర ఆటంకం ఏర్పడుతోందని, కొందరు విద్యార్థులు ఆర్థిక ఇబ్బందులతో చదువును మధ్యలోనే నిలిపివేసే పరిస్థితి ఏర్పడుతోందని అన్నారు. ఈ సమస్య ప్రభావం విద్యార్థుల కుటుంబాలపై కూడా తీవ్రంగా పడుతోందని పేర్కొన్నారు.
విద్యార్థుల భవిష్యత్తును దృష్టిలో ఉంచుకుని ప్రభుత్వం పెండింగ్లో ఉన్న ఫీజు రీయింబర్స్మెంట్ బకాయిలను తక్షణమే విడుదల చేసి, విద్యార్థులు ఎటువంటి ఆటంకాలు లేకుండా తమ విద్యను కొనసాగించేలా చర్యలు తీసుకోవాలని జిల్లా కలెక్టర్ ద్వారా ప్రభుత్వాన్ని కోరారు.
ఈ కార్యక్రమంలో BC, SC, ST-JAC మరియు DSP జిల్లా వైస్ ప్రెసిడెంట్ లింగస్వామి, జలందర్, జిల్లా ప్రధాన కార్యదర్శి వి. శ్రీకాంత్, కార్యదర్శులు బి.ఆర్. సాయి కుమార్, ఏ. సురేష్, కె. సాయి కిరణ్, వెంకటేష్, చెక్క సాయి కుమార్, కె. గణేష్ తదితరులు పాల్గొన్నారు.
