నవపక్షం, నాంపల్లి, సెప్టెంబర్ 28:
వ్యవసాయ భూమికి సంబంధించిన పంచనామా నివేదికను తహసీల్దార్కు సమర్పించేందుకు లంచం డిమాండ్ చేసి, రూ.15 వేల నగదు స్వీకరిస్తుండగా నాంపల్లి మండల రెవెన్యూ ఇన్స్పెక్టర్తో పాటు ఓ ప్రైవేటు వ్యక్తి ఏసీబీ అధికారులకు పట్టుబడ్డారు.
నల్గొండ జిల్లా నాంపల్లి మండల తహసీల్దార్ కమ్ జాయింట్ సబ్-రిజిస్ట్రార్ కార్యాలయంలో రెవెన్యూ ఇన్స్పెక్టర్గా విధులు నిర్వహిస్తున్న రాళ్లబండి గోపరాజు (AO-1), ఓ ఫిర్యాదుదారుడి వ్యవసాయ భూమికి సంబంధించిన పంచనామా నివేదికను తహసీల్దార్కు సమర్పించి అధికారిక ప్రక్రియ పూర్తి చేసేందుకు రూ.15,000 లంచం డిమాండ్ చేసినట్లు ఏసీబీ అధికారులు తెలిపారు.
గోపరాజు తన వద్ద అసిస్టెంట్గా పనిచేస్తున్న ప్రైవేటు వ్యక్తి అదుళ్ల యాదగిరి (A-2) ద్వారా లంచం స్వీకరిస్తుండగా సోమవారం నల్గొండ రేంజ్ ఏసీబీ అధికారులు దాడి చేసి ఇద్దరినీ అదుపులోకి తీసుకున్నారు. యాదగిరి వద్ద నుంచి రూ.15,000 లంచం నగదును స్వాధీనం చేసుకున్నట్లు అధికారులు వెల్లడించారు.
ఇద్దరినీ అరెస్టు చేసి హైదరాబాద్ నాంపల్లిలోని SPE & ACB కేసుల ప్రిన్సిపల్ స్పెషల్ జడ్జి ఎదుట రిమాండ్ కోసం హాజరుపరుస్తున్నట్లు ఏసీబీ అధికారులు తెలిపారు. ఫిర్యాదుదారుడి వివరాలను భద్రతా కారణాల దృష్ట్యా గోప్యంగా ఉంచినట్లు పేర్కొన్నారు.
