నవపక్షం, మర్రిగూడ ప్రతినిధి :
మర్రిగూడ: నల్గొండ జిల్లా మర్రిగూడలోని పీఎం శ్రీ మోడల్ స్కూల్లో ఇంటర్మీడియట్ ప్రథమ సంవత్సరం విద్యార్థుల స్వాగత వేడుకలను (ఫ్రెషర్స్ డే) ఘనంగా నిర్వహించారు. ఈ సందర్భంగా విద్యార్థులు నిర్వహించిన సాంస్కృతిక కార్యక్రమాలు, నృత్య ప్రదర్శనలు, ఆటలు, వినోద కార్యక్రమాలు అందరినీ ఆకట్టుకున్నాయి. విద్యార్థులు ఉత్సాహంగా పాల్గొని తమలోని ప్రతిభను ప్రదర్శించారు.
వేడుకల్లో భాగంగా విద్యార్థులు చేసిన నృత్య ప్రదర్శనలు, వివిధ ఆటలు ప్రత్యేక ఆకర్షణగా నిలిచాయి. పాటలు, నృత్యాలతో పాఠశాల ప్రాంగణం సందడిగా మారింది. నూతనంగా పాఠశాలలో చేరిన విద్యార్థులకు ఈ వేడుకలు ఆనందాన్ని పంచడంతో పాటు సీనియర్ విద్యార్థులతో స్నేహభావాన్ని పెంపొందించాయి.
ఈ సందర్భంగా పాఠశాల ప్రిన్సిపాల్ ఉయ్యాల వెంకటేశం మాట్లాడుతూ, విద్యార్థుల జీవితంలో ఇంటర్మీడియట్ విద్య ఎంతో కీలకమైన దశ అని పేర్కొన్నారు. విద్యార్థులు క్రమశిక్షణ, పట్టుదల, సమయపాలనతో చదువులో రాణించాలని సూచించారు. విద్యతో పాటు క్రీడలు, సాంస్కృతిక కార్యక్రమాల్లోనూ పాల్గొని తమలోని ప్రతిభను వెలికితీయాలని అన్నారు. ఉన్నత లక్ష్యాలను నిర్దేశించుకుని వాటి సాధన కోసం నిరంతరం కృషి చేయాలని, తల్లిదండ్రులకు, ఉపాధ్యాయులకు మంచి పేరు తీసుకురావాలని విద్యార్థులకు పిలుపునిచ్చారు.
కార్యక్రమానికి వ్యాఖ్యాతలుగా వ్యవహరించిన ప్రసన్న, లావణ్య తమ చక్కటి వ్యాఖ్యానంతో వేడుకలను మరింత ఉత్సాహభరితంగా ముందుకు నడిపించారు. వారి వ్యాఖ్యానం విద్యార్థులను, ఉపాధ్యాయులను ఆకట్టుకుంది.
ఈ కార్యక్రమంలో ఉపాధ్యాయులు ఆర్. కరుణాకర్, జి. సబిత, పి. శ్రీనివాస్, వి. దొరతి, జి. మాధురి, పి. లింగస్వామి, డి. భవాని, కె. నాగమనీషా, ఎన్. వెంకటయ్య, మహమ్మద్ రజియుద్దీన్, బి. సూర్యకుమారి, టి. అనురాధ, బి. కోమలి, జె. విజయ, సాజిద, యాదయ్య, శంకర్, నసరత్, చంద్రమౌళి, సమతా, వెంకటరమణ, లక్ష్మీ, రామ్ నరేష్, శ్రీహరి, కొండల్ తదితర ఉపాధ్యాయులు, బోధనేతర సిబ్బంది పాల్గొన్నారు.
విద్యార్థుల ఉత్సాహం, ఉపాధ్యాయుల సహకారంతో స్వాగత వేడుకలు ఆహ్లాదకర వాతావరణంలో విజయవంతంగా ముగిశాయి.
