నవపక్షం, యాదాద్రి భువనగిరి జిల్లా ప్రతినిధి :
సుప్రీంకోర్టు న్యాయమూర్తి జస్టిస్ ఆర్. మహదేవన్ యాదాద్రి భువనగిరి జిల్లాలో పర్యటించారు. ఈ సందర్భంగా ప్రముఖ పుణ్యక్షేత్రమైన యాదగిరిగుట్ట శ్రీలక్ష్మీనరసింహస్వామి ఆలయాన్ని, కొలనుపాకలోని శ్రీ సోమేశ్వరస్వామి ఆలయాన్ని సందర్శించి స్వామివారిని దర్శించుకున్నారు.
యాదగిరిగుట్టకు విచ్చేసిన జస్టిస్ ఆర్. మహదేవన్‌కు యాదాద్రి భువనగిరి జిల్లా ఎస్పీ అక్షాన్ష్ యాదవ్, ఐపీఎస్ పుష్పగుచ్ఛం అందజేసి ఘనంగా స్వాగతం పలికారు. అనంతరం జిల్లా పోలీసుల ఆధ్వర్యంలో గౌరవనీయ అతిథికి గౌరవ వందనం సమర్పించారు.
అనంతరం జస్టిస్ ఆర్. మహదేవన్ యాదగిరిగుట్ట శ్రీలక్ష్మీనరసింహస్వామి ఆలయంలో స్వామివారిని దర్శించుకుని ప్రత్యేక పూజలు నిర్వహించారు. ఆలయ అర్చకులు, అధికారులు ఆయనకు ఆలయ సంప్రదాయాల ప్రకారం స్వాగతం పలికి స్వామివారి తీర్థప్రసాదాలను అందజేశారు.
అనంతరం ఆయన కొలనుపాక శ్రీ సోమేశ్వరస్వామి ఆలయాన్ని సందర్శించి స్వామివారిని దర్శించుకుని ప్రత్యేక పూజలు నిర్వహించారు. ఈ సందర్భంగా ఆలయ విశిష్టత, చారిత్రక ప్రాధాన్యతకు సంబంధించిన వివరాలను అధికారులు ఆయనకు తెలియజేశారు.
ఈ పర్యటనలో యాదాద్రి భువనగిరి జిల్లా కలెక్టర్ అనురాగ్ జయంతి, ఐఏఎస్ కూడా జస్టిస్ ఆర్. మహదేవన్ వెంట ఉన్నారు. జిల్లా ఉన్నతాధికారులు, పోలీసు అధికారులు, ఆలయ అధికారులు పర్యటనకు సంబంధించిన ఏర్పాట్లను పర్యవేక్షించారు.
గౌరవనీయ సుప్రీంకోర్టు న్యాయమూర్తి జిల్లా పర్యటన నేపథ్యంలో జిల్లా పోలీస్ యంత్రాంగం పటిష్టమైన భద్రతా ఏర్పాట్లు, ప్రోటోకాల్ చర్యలను సమన్వయంతో చేపట్టింది. ఎలాంటి అవాంఛనీయ ఘటనలకు తావులేకుండా పర్యటన సజావుగా జరిగేలా అధికారులు చర్యలు తీసుకున్నారు.
