నవపక్షం , దేవరకొండ మండల ప్రతినిధి :
విద్యార్థులకు ఎన్నికల నిర్వహణ, ఓటింగ్‌ ప్రక్రియపై ప్రత్యక్ష అవగాహన కల్పించేందుకు మునగాల కొండల్‌రావు ప్రభుత్వ డిగ్రీ కళాశాల (అటానమస్‌)లో మాక్‌ ఎలక్షన్స్‌ నిర్వహించారు. పొలిటికల్‌ సైన్స్‌ విభాగం ఆధ్వర్యంలో బెస్ట్‌ ప్రాక్టీస్‌లో భాగంగా ఈ కార్యక్రమాన్ని చేపట్టారు.
ఎన్నికల ప్రకటన నుంచి అభ్యర్థుల ఎంపిక, ప్రచారం, ఓటర్ల జాబితా తయారీ, పోలింగ్‌ కేంద్రం ఏర్పాటు, ఓటింగ్‌, ఓట్ల లెక్కింపు వరకు వివిధ దశలను విద్యార్థులతోనే నమూనా ఎన్నికల రూపంలో నిర్వహించారు. ఎన్నికల నియమ నిబంధనలు, ఓటు హక్కు వినియోగం, బాధ్యతాయుతమైన ఓటరు పాత్రపై అవగాహన కల్పించారు.
అలాగే వార్తా ప్రసారాలపై అవగాహన కల్పించేందుకు న్యూస్‌ ఛానల్‌కు చెందిన న్యూస్‌ యాంకర్‌తో ప్రత్యేక శిక్షణ ఇప్పించారు. ప్రజాస్వామ్యంలో ఎన్నికల ప్రాధాన్యం, బాధ్యతాయుత పౌరసత్వంపై విద్యార్థులకు అవగాహన కల్పించడమే కార్యక్రమం ఉద్దేశమని కళాశాల ప్రిన్సిపాల్‌ రామవత్‌ రవి తెలిపారు.
