నవపక్షం, కేతేపల్లి మండల ప్రతినిధి :
నల్గొండ జిల్లా కేతేపల్లి మండలం గుడివాడ గ్రామంలో బతుకమ్మ సంబరాలు ఘనంగా నిర్వహించారు. ఈ సందర్భంగా గ్రామానికి చెందిన మహిళలు, యువతులు రంగురంగుల పూలతో అందంగా బతుకమ్మలను పేర్చి, సంప్రదాయ వస్త్రధారణలో వేడుకల్లో పాల్గొన్నారు.
గ్రామంలోని మహిళలు పెద్ద సంఖ్యలో ఒకచోట చేరి బతుకమ్మ పాటలు పాడుతూ, ఆటపాటలతో సందడి చేశారు. గ్రామ వీధులు బతుకమ్మలతో, మహిళల కోలాహలంతో పండుగ శోభను సంతరించుకున్నాయి. రాత్రివేళ విద్యుత్ దీపాల వెలుగుల్లో నిర్వహించిన బతుకమ్మ వేడుకలు ప్రత్యేక ఆకర్షణగా నిలిచాయి.
తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను గ్రామస్తులంతా ఐకమత్యంతో జరుపుకోవడం ఆనందంగా ఉందని పలువురు పేర్కొన్నారు. ఈ వేడుకలతో గ్రామంలో పండుగ వాతావరణం నెలకొంది.
