నవపక్షం, రాయవరం ప్రతినిధి :
రాయవరం ప్రధాన రహదారిపై ఆదివారం రాత్రి జరిగిన రోడ్డు ప్రమాదంలో పెను ప్రమాదం తృటిలో తప్పింది. తీర్థయాత్ర ముగించుకుని ఇంటికి తిరిగి వస్తున్న ఓ కుటుంబం ప్రయాణిస్తున్న కారు ఎదురుగా వస్తున్న లారీని ఢీకొట్టింది. ఈ ప్రమాదంలో కారు ముందు భాగం పూర్తిగా ధ్వంసమైంది.
సమాచారం ప్రకారం, ప్రమాద సమయంలో కారులో ముగ్గురు పెద్దలు, నలుగురు చిన్నారులు ఉన్నారు. ఎదురుగా వస్తున్న వాహనం హెడ్‌లైట్ల వెలుతురు కారణంగా డ్రైవర్‌కు రహదారి స్పష్టంగా కనిపించకపోవడంతో కారు అదుపుతప్పి లారీని ఢీకొన్నట్లు తెలుస్తోంది. అయితే, అదృష్టవశాత్తూ కారులో ప్రయాణిస్తున్న వారంతా స్వల్ప గాయాలతో బయటపడటంతో పెద్ద ప్రమాదం తప్పింది.
రహదారి ఆక్రమణలతో పెరుగుతున్న ప్రమాద ముప్పు
రాయవరం ప్రధాన రహదారిపై ఆక్రమణల కారణంగా రహదారి వెడల్పు తగ్గిపోతోందని స్థానికులు ఆందోళన వ్యక్తం చేస్తున్నారు. రహదారిపై ఆక్రమణలు, అడ్డంకులు ఉండటంతో ఎదురెదురుగా వాహనాలు వచ్చినప్పుడు రాకపోకలకు తీవ్ర ఇబ్బందులు ఎదురవుతున్నాయని పేర్కొంటున్నారు. ఈ పరిస్థితులు రోడ్డు ప్రమాదాలకు దారితీసే ప్రమాదం ఉందని హెచ్చరిస్తున్నారు.
ఈ ప్రాంతంలో తరచూ ప్రమాదాలు జరుగుతున్నప్పటికీ సంబంధిత అధికారులు తగిన చర్యలు తీసుకోవడం లేదని స్థానికులు ఆరోపిస్తున్నారు. ప్రజల ప్రాణ భద్రతను దృష్టిలో ఉంచుకుని రహదారి ఆక్రమణలను తక్షణమే తొలగించాలని, రహదారిపై ఉన్న అడ్డంకులను నివారించాలని, భవిష్యత్తులో ప్రమాదాలు జరగకుండా శాశ్వత చర్యలు చేపట్టాలని వారు సంబంధిత అధికారులను డిమాండ్ చేస్తున్నారు.
ప్రజల రాకపోకలకు ఇబ్బందులు కలగకుండా రహదారిని సురక్షితంగా తీర్చిదిద్దడంతో పాటు, ప్రమాదాల నివారణకు అధికారులు తక్షణమే స్పందించాలని స్థానికులు కోరుతున్నారు.
