నాంపల్లి, నవపక్షం ప్రతినిధి:
నాంపల్లి మండల కేంద్రానికి చెందిన కవి, రచయిత, సికింద్రాబాద్‌ గవర్నమెంట్‌ ఇన్‌స్టిట్యూట్‌ ఆఫ్‌ ఎలక్ట్రానిక్స్‌ పాలనాధికారి నక్క శ్రీనివాస్‌ స్వయంగా రచించిన ‘మట్టి… మహిళ… మనిషి’ కవితా సంకలన పుస్తకాల పంపిణీ కార్యక్రమం శనివారం నాంపల్లిలో నిర్వహించారు.
తెలంగాణ శాసనమండలి సభ్యులు దేశపతి శ్రీనివాస్‌ చేతుల మీదుగా రవీంద్రభారతిలో ఆవిష్కరించిన ఈ పుస్తకాలను నాంపల్లి గ్రామపంచాయతీలో నల్లగొండ జిల్లా ప్రెస్‌క్లబ్‌ అధ్యక్షుడు గాలెంక గురుపాదం, పంచాయతీ కార్యదర్శి బుర్రి శ్రీనివాస్‌, TUWJ-143 మునుగోడు నియోజకవర్గం ఉపాధ్యక్షుడు కామిశెట్టి ప్రెస్‌ యాదయ్య, TUWJ-143 నాంపల్లి మండల శాఖ అధ్యక్షుడు గడ్డం వెంకటేశ్వర్లు, జర్నలిస్ట్‌ కామిశెట్టి శ్రీకాంత్‌లకు అందజేశారు.
అదేవిధంగా నాంపల్లి శాఖ గ్రంథాలయం, జిల్లా పరిషత్‌ ఉన్నత పాఠశాలలో కూడా పుస్తకాలను అందుబాటులో ఉంచారు. సాహిత్యాభిమానులు పుస్తకాలను చదివి తమ అమూల్యమైన సలహాలు, సూచనలు అందించాలని నక్క శ్రీనివాస్‌ కోరారు.
ఈ సందర్భంగా జిల్లా ప్రెస్‌క్లబ్‌ అధ్యక్షుడు గాలెంక గురుపాదం మాట్లాడుతూ, నాంపల్లి గడ్డపై ఒక కవి, రచయితగా నక్క శ్రీనివాస్‌ ఎదిగి, తన సాహిత్యంతో మండల ఖ్యాతిని రాష్ట్ర స్థాయికి తీసుకెళ్లడం అభినందనీయమన్నారు. నాంపల్లి పట్టణ ప్రజలు, పాత్రికేయుల తరఫున నక్క శ్రీనివాస్‌కు ప్రత్యేక అభినందనలు తెలిపారు.
