నవపక్షం, భద్రాద్రి కొత్తగూడెం ప్రతినిధి:
తరతరాలుగా పోడు కొట్టుకుంటూ భద్రాద్రి కొత్తగూడెం జిల్లాలో పోడు వ్యవసాయంపై ఆధారపడి జీవిస్తున్న వారికి పోడు భూముల సమస్యల పరిష్కారంపై త్వరలోనే తీపి కబురు చెబుతానని రాష్ట్ర రెవెన్యూ గృహ నిర్మాణం సమాచార శాఖల మంత్రి పొంగులేటి శ్రీనివాసరెడ్డి ప్రకటించారు. ఆదివారం లక్ష్మీదేవి పల్లి మండలం రేగళ్లలో జరిగిన కాంగ్రెస్ పార్టీ మండల స్థాయి విస్తృత సమావేశంలో ప్రసంగించారు. అటవీ భూములకు సంబంధించి కొన్ని అంశాలు కేంద్ర ప్రభుత్వం పరిధిలో ఉన్నాయని కేంద్రంతో సంప్రదించి వాటి పరిష్కారానికి కృషి చేస్తానని తెలిపారు.
సంక్షేమం అభివృద్ధికి ప్రాధాన్యం
గత తొమ్మిదిన్నర ఏళ్ల పాలనలో పేదలను పట్టించుకోలేదని గళ మెత్తిన నిరుద్యోగులను ఉరికించి కొట్టారని 33 నెలల మా ప్రజా ప్రభుత్వ పాలనలో రైతు రుణమాఫీ రైతు భరోసా క్వింటాకు రూ.500 బోనస్ మహిళలకు ఉచిత బస్సు ప్రాయాణం పేదలకు 200 యూనిట్ల వరకు ఉచిత విద్యుత్ ఉద్యోగులకు నోటిఫికేషన్లతో ప్రజా సంక్షేమ పథకాలతో ముందుకు సాగుతున్నామని వివరించారు. బీఆర్ఎస్ హయాంలో పేదలకు ఇళ్లిస్తే కమిషన్లు రావని లక్ష కోట్లతో కాళేశ్వరం కట్టి ఇష్టం వచ్చినట్లు దోచుకోగా వారు అధికారంలో ఉన్నప్పుడే అది కూలే పరిస్థితి వచ్చిందని విమర్శించారు. అన్ని గ్రామాలకు నిధులిస్తానని ఖమ్మం జిల్లాతో పాటు భద్రాద్రి కొత్తగూడెం జిల్లా సమగ్ర అభివృద్ధికి కృషి చేస్తానని తెలిపారు. అన్ని గ్రామాలకు నిధులను కేటాయించి మౌలిక వసతులు కల్పిస్తామని తెలిపారు. ఇందిరమ్మ ఇళ్లను మూడు అవసరమైతే నాలుగో విడతలో కూడా మంజూరు చేస్తామని రాజకీయాలకు అతీతంగా పేదలకు కేటాయిస్తామని వెల్లడించారు. హైదరాబాదులోని పేదలు వారు పనిచేసే ప్రాంతాల్లోనే ఖరీదైన భూముల్లో అపార్ట్ మెంట్లు కట్టించి ఇస్తున్నామని ఒక్కొక్కరికీ రూ.కోటి విలువ చేసే ఇల్లు దక్కుతోందని అన్నారు. ఎమ్మెల్సీ ఎన్నికలకు సిద్ధంగా ఉండాలి. ఖమ్మం, నల్లగొండ, వరంగల్ గ్రాడ్యుయేట్ ఎమ్మెల్సీ ఎన్నికల నేపథ్యంలో కాంగ్రెస్ ఆధ్వర్యంలో గ్రాడ్యుయేట్ ఓటర్ల నమోదు ప్రక్రియను వేగవంతం చేయాలని సూచించారు. బృందాలుగా గ్రామ మండల స్థాయిలో విస్తృతంగా పనిచేయాలని కోరారు.
ఈ కార్యక్రమంలో భద్రాచలం ఎమ్మెల్యే తెల్లం వెంకట్రావ్, కాంగ్రెస్ పార్టీ జిల్లా అధ్యక్షురాలు దేవీ ప్రసన్న, సీనియర్ నాయకులు నాగా సీతారాములు, ఆళ్ల మురళి, గోపాలరావు, మండల అధ్యక్షులు ప్రసాద్, పలువురు ప్రజాప్రతినిధులు, నాయకులు పాల్గొన్నారు.
