నవపక్షం, కోట ప్రతినిధి :
కోట అంబేడ్కర్ గురుకుల పాఠశాల మూసివేత అంశంపై ప్రభుత్వం తక్షణమే స్పందించి, పాఠశాలను పునఃప్రారంభించే విషయంలో స్పష్టమైన హామీ ఇవ్వాలని సమాజ చైతన్య సమితి, బహుజన యూత్ ఫోర్స్ నాయకులు డిమాండ్ చేశారు.
ఈ మేరకు ఈ రోజు విద్యానగర్‌లో సమాజ చైతన్య సమితి, బహుజన యూత్ ఫోర్స్ ఆధ్వర్యంలో సంయుక్తంగా విలేకరుల సమావేశం నిర్వహించారు.
ఈ సందర్భంగా సమాజ చైతన్య సమితి అధ్యక్షులు ఉయ్యాల రామకృష్ణారావు మాట్లాడుతూ, దళిత విద్యార్థుల విద్యకు సంబంధించిన అంశంపై ప్రభుత్వం మరియు ప్రజాప్రతినిధులు తక్షణం స్పందించాల్సిన అవసరం ఉందన్నారు. ఒక సామాజిక వర్గానికి చెందిన విద్యార్థుల విద్యా అవకాశాలకు సంబంధించిన సమస్యపై మౌనం వహించడం బాధాకరమని ఆయన అన్నారు.
కోట చరిత్రలో ప్రాధాన్యత కలిగిన నల్లపరెడ్డి శ్రీనివాసులు రెడ్డి ప్రారంభించిన గురుకుల పాఠశాలగా పేర్కొంటున్న ఈ విద్యాసంస్థ మూసివేతపై ఆయన వారసులు, సంబంధిత ప్రజాప్రతినిధులు మరియు రాజకీయ నాయకులు మరింత చురుకుగా స్పందించాలని రామకృష్ణారావు కోరారు.
ప్రతిపక్ష పార్టీల నాయకులు గతంలో ఉద్యమ నాయకులతో కలిసి పోరాటం చేస్తామని ప్రకటించినప్పటికీ, అనంతరం ఆ స్థాయిలో కార్యాచరణ కనిపించకపోవడం నిరాశ కలిగిస్తోందన్నారు. కేవలం విలేకరుల సమావేశాలకు పరిమితం కాకుండా, విద్యార్థుల సమస్య పరిష్కారం కోసం కార్యాచరణ చేపట్టాలని ఆయన కోరారు.
బహుజన యూత్ ఫోర్స్ కన్వీనర్ శ్రీరాం శివప్రసాద్ మాట్లాడుతూ, దళిత విద్యార్థులకు నాణ్యమైన విద్యను అందించడంలో గురుకుల విద్యా వ్యవస్థ కీలక పాత్ర పోషిస్తోందన్నారు. ఈ విద్యా వ్యవస్థకు సంబంధించిన నిర్ణయాల ప్రభావం విద్యార్థుల భవిష్యత్తుపై పడకుండా ప్రభుత్వం బాధ్యతాయుతంగా వ్యవహరించాల్సిన అవసరం ఉందన్నారు.
వేల సంవత్సరాలుగా సామాజిక వివక్ష, విద్యా అవకాశాల కొరతను ఎదుర్కొన్న అణగారిన వర్గాలకు డాక్టర్ బి.ఆర్. అంబేడ్కర్ చూపిన విద్యా మార్గం ఎంతో ప్రాధాన్యమైనదని ఆయన పేర్కొన్నారు. విద్య ద్వారా ఉద్యోగ, ఆర్థిక మరియు సామాజిక అభివృద్ధికి అవకాశాలు ఏర్పడ్డాయని అన్నారు.
కోట అంబేడ్కర్ గురుకుల పాఠశాల మూసివేత లేదా విద్యార్థులను ఇతర పాఠశాలలకు తరలించే ప్రక్రియ వల్ల విద్యార్థులు, తల్లిదండ్రులు ఎదుర్కొంటున్న ఇబ్బందులపై ప్రభుత్వం సమగ్రంగా సమీక్షించాలని ఆయన కోరారు. వసతులు, విద్యా వాతావరణం, విద్యార్థుల భద్రత, బోధనా సౌకర్యాలు వంటి అంశాలను పరిగణనలోకి తీసుకుని నిర్ణయాలు తీసుకోవాలని అన్నారు.
అలాగే గురుకుల పాఠశాలలో పనిచేస్తున్న కాంట్రాక్ట్ సిబ్బంది వేతనాలకు సంబంధించిన సమస్యలను కూడా ప్రభుత్వం పరిష్కరించాలని శ్రీరాం శివప్రసాద్ డిమాండ్ చేశారు. COE (Centre of Excellence) విధానంలో విద్యార్థుల వసతి, విద్యా వాతావరణం, బాలికల తల్లిదండ్రుల ఆందోళనలు తదితర అంశాలపై కూడా ప్రభుత్వం స్పష్టత ఇవ్వాలని కోరారు.
సమాజ చైతన్య సమితి నాయకులు పంట్రంగం వసంత్ మాట్లాడుతూ, కోట అంబేడ్కర్ గురుకుల పాఠశాల పునఃప్రారంభం కోసం ప్రజాస్వామ్య పద్ధతుల్లో నిరంతర పోరాటం కొనసాగిస్తామని తెలిపారు. కరపత్రాలు, వాల్ పోస్టర్లు, ప్రజా అవగాహన కార్యక్రమాల ద్వారా ప్రజలను చైతన్యపరిచి, సమస్య పరిష్కారం కోసం ప్రభుత్వంపై ప్రజాస్వామ్యబద్ధంగా ఒత్తిడి తీసుకువస్తామని అన్నారు.
విద్యార్థుల భవిష్యత్తును దృష్టిలో ఉంచుకుని ప్రభుత్వం తక్షణమే సంబంధిత అధికారులతో సమీక్ష నిర్వహించి, పాఠశాల పునఃప్రారంభం, విద్యార్థుల విద్యా సౌకర్యాలు, వసతి, సిబ్బంది సమస్యలపై స్పష్టమైన నిర్ణయం ప్రకటించాలని నాయకులు డిమాండ్ చేశారు.
ఈ సందర్భంగా ప్రధాన డిమాండ్లు:
- కోట అంబేడ్కర్ గురుకుల పాఠశాల పునఃప్రారంభంపై ప్రభుత్వం స్పష్టమైన హామీ ఇవ్వాలి.
- విద్యార్థులను ఇతర పాఠశాలలకు తరలించినట్లయితే వారి విద్యా, వసతి, భద్రతా సమస్యలను ప్రభుత్వం సమీక్షించాలి.
- గురుకుల పాఠశాల కాంట్రాక్ట్ సిబ్బంది వేతనాల సమస్యను పరిష్కరించాలి.
- COE విధానంలో విద్యార్థులు, ముఖ్యంగా బాలికలు ఎదుర్కొంటున్న సమస్యలపై ప్రభుత్వం స్పష్టత ఇవ్వాలి.
- విద్యార్థులు మరియు తల్లిదండ్రులతో సంప్రదింపులు జరిపి తదుపరి నిర్ణయాలు తీసుకోవాలి.
- పాఠశాల పునఃప్రారంభానికి అవసరమైన చర్యలను ప్రభుత్వం తక్షణమే చేపట్టాలి.
ఈ కార్యక్రమలో సమాజ చైతన్య సమితి నాయకులు ఉయ్యాల రామకృష్ణారావు, పంట్రంగం వసంత్, తిరుమూరు క్రిష్ణయ్య, యన్. బాబు, బహుజన యూత్ ఫోర్స్ కన్వీనర్ శ్రీరాం శివప్రసాద్, కన్వీనర్ దాసరి అశోక్ కాంబ్లే, గౌరవ సలహాదారు కనుపూరు క్రిష్ణయ్య తదితరులు పాల్గొన్నారు.
