నారాయణపేట, ఆగస్టు 14 (నవపక్షం, నారాయణపేట ప్రతినిధి):
నారాయణపేట జిల్లాలో ప్రత్యేక అధికారులు తమకు కేటాయించిన మండలాల్లో విస్తృతంగా పర్యటించి, ప్రజా సమస్యలను గుర్తించి వాటి పరిష్కారానికి తక్షణ చర్యలు చేపట్టాలని జిల్లా కలెక్టర్ ప్రియాంక ఆదేశించారు.
శుక్రవారం కలెక్టరేట్‌లోని వీడియో కాన్ఫరెన్స్ హాల్‌లో మండల ప్రత్యేక అధికారులతో కలెక్టర్ సమీక్షా సమావేశం నిర్వహించారు. ఈ సందర్భంగా మండలాల వారీగా అభివృద్ధి పనులు, ప్రజా సమస్యలు, ప్రభుత్వ సంక్షేమ కార్యక్రమాల అమలుపై సమీక్షించారు. కొడంగల్ నియోజకవర్గంలోని గుండుమాల్‌తో పాటు వివిధ మండలాల్లో నెలకొన్న సమస్యలను అధికారులను అడిగి తెలుసుకున్నారు.
దామరగిద్ద, మద్దూరు, ధన్వాడ, కోస్గి, కృష్ణా మండలాల్లో 286 మంది పిల్లలు ఉన్నారని ప్రత్యేక అధికారి రహమాన్ తెలిపారు. ఆయా కేజీబీవీలను తనిఖీ చేసినట్లు వివరించారు. హిందూపూర్ కేజీబీవీలో 443 మంది విద్యార్థులు ఉండగా, టాయిలెట్లకు మరమ్మతులు అవసరమని తెలిపారు. మాగనూరు కేజీబీవీలో 369 మంది విద్యార్థులు ఉన్నారని, అదనపు గదులు, కాంపౌండ్ వాల్ అవసరమని వివరించారు.
మక్తల్‌లో 250 మంది పిల్లలు ఉన్నారని, మరికల్, అప్పంపల్లి పాఠశాలల్లో కిటికీలు, డైనింగ్ హాల్ అవసరమని ప్రత్యేక అధికారులు తెలిపారు. డైనింగ్ హాల్ వంటి అవసరమైన పనులకు 15వ ఆర్థిక సంఘం నిధులను వినియోగించుకోవచ్చని కలెక్టర్ సూచించారు.
ఈ సందర్భంగా ప్రత్యేక అధికారులకు కలెక్టర్ పలు కీలక ఆదేశాలు జారీ చేశారు. మండల కేంద్రాల్లో క్షేత్రస్థాయిలో విస్తృతంగా పర్యటించాలని, పంచాయతీలను పరిశుభ్రంగా ఉంచేలా చర్యలు చేపట్టాలని ఆదేశించారు. పీఎస్సీలు, ఎంపీపీఎస్ పాఠశాలలను తప్పనిసరిగా సందర్శించి అక్కడి సమస్యలను గుర్తించాలన్నారు.
డ్రై డే కార్యక్రమాలపై ప్రత్యేక దృష్టి సారించాలని, కేజీబీవీల్లో విద్యార్థులకు అవసరమైన మౌలిక వసతులను పరిశీలించాలని సూచించారు. ఊట్కూరు, నారాయణపేట మండలాల అవసరాలపై సమగ్ర ప్రతిపాదనలు సమర్పించాలని ఆదేశించారు.
అలాగే ఇందిరమ్మ ఇళ్ల నిర్మాణ పురోగతిని క్షేత్రస్థాయిలో పరిశీలించి, పనులు వేగవంతమయ్యేలా చర్యలు తీసుకోవాలని కలెక్టర్ సూచించారు. ప్రభుత్వ సంక్షేమ, అభివృద్ధి కార్యక్రమాలు ప్రజలకు పూర్తిస్థాయిలో అందేలా అన్ని శాఖల అధికారులు సమన్వయంతో పనిచేయాలని ఆదేశించారు.
ఈ సమావేశంలో అదనపు కలెక్టర్ (రెవెన్యూ) శ్రీను, డీఆర్వో రాజేశ్వరి, ప్రత్యేక అధికారులు తదితరులు పాల్గొన్నారు.
