నవపక్షం, చర్ల మండల ప్రతినిధి, సెప్టెంబర్ 6:
భద్రాద్రి కొత్తగూడెం జిల్లా చర్ల మండలం చర్ల గ్రామానికి చెందిన ప్రముఖ సామాజిక సేవకులు నీలి ప్రకాష్ మరో ప్రతిష్ఠాత్మక పురస్కారానికి ఎంపికయ్యారు. నేతన్న టీవీ ప్రథమ వార్షికోత్సవం సందర్భంగా ఈ నెల 6న హన్మకొండలోని ఎస్‌వీఎస్ క్యాంపస్‌లో నిర్వహించనున్న కార్యక్రమంలో ఆయనకు ఈ అవార్డును అందజేయనున్నారు.
నీలి ప్రకాష్ గత రెండు దశాబ్దాలుగా సామాజిక సేవా కార్యక్రమాలను నిరంతరంగా నిర్వహిస్తూ, పేదలు, ఆదివాసీలు, విద్యార్థులు, మహిళలు, అనారోగ్యంతో బాధపడుతున్న వారికి అండగా నిలుస్తున్నారు.
2004లో పర్యావరణ పరిరక్షణ కమిటీ ఛైర్మన్‌గా తన సేవా కార్యక్రమాలను ప్రారంభించిన ఆయన, అప్పటి నుంచి వివిధ రంగాల్లో సేవలను విస్తరించారు. సింగసముద్రం గ్రామాన్ని దత్తత తీసుకుని రహదారులు, విద్య, విద్యుత్ వంటి మౌలిక సదుపాయాల కల్పనకు కృషి చేశారు.
ఛత్తీస్‌గఢ్ రాష్ట్రం నుంచి చర్ల మండల కేంద్రంలో జరిగే వారపు సంతకు వచ్చే ఆదివాసీల ఆకలి తీర్చేందుకు 176 వారాల పాటు నిరంతర అన్నదాన కార్యక్రమాన్ని నిర్వహించారు. దూర ప్రాంతాల నుంచి వచ్చే వారికి చెప్పులు, దుస్తులు పంపిణీ చేయడంతో పాటు, పాఠశాల విద్యార్థులకు పలకలు, పుస్తకాలు, పెన్నులు, నోటుపుస్తకాలు, స్కూల్ బ్యాగులను అందించారు.
ఆపదలో ఉన్న వారికి దాతల సహకారంతో ఆర్థిక సహాయం అందించడం, మహిళల ఉపాధి కోసం కుట్టు మిషన్లు పంపిణీ చేయడం, నిరుపేద విద్యార్థుల ఉన్నత చదువులకు ఆర్థిక సహాయం చేయడం, అనారోగ్యంతో బాధపడుతున్న వారికి ఆసుపత్రి ఖర్చుల కోసం ఆర్థిక సహాయం అందించడం వంటి అనేక సేవా కార్యక్రమాలను ఆయన చేపట్టారు.
2026 వరకు మొత్తం 1,035 సేవా కార్యక్రమాలను సుమారు రూ.95 లక్షల వ్యయంతో నిర్వహించి, లక్షన్నర మందికి పైగా లబ్ధిదారులకు అండగా నిలిచినట్లు తెలిపారు.
ఇప్పటి వరకు అందుకున్న పురస్కారాలు
నీలి ప్రకాష్ సేవలను గుర్తించి పలు సంస్థలు ఆయనను సత్కరించాయి.
2018: లయన్స్ క్లబ్ గవర్నర్ చేతుల మీదుగా సేవా దర్పణ్ అవార్డు
2019: అంతర్జాతీయ లయన్స్ జర్నల్‌లో చర్లలో నిర్వహించిన సేవా కార్యక్రమాలపై ప్రత్యేక కథనం
2019: ఛత్తీస్‌గఢ్ ముఖ్యమంత్రి కార్యాలయం నుంచి ప్రశంసలు
పలు సంస్థలచే పౌర సన్మానాలు
2022: బహుజన సాహిత్య అకాడమీ, ఢిల్లీ వారిచే జాతీయ స్థాయి సేవా రత్న అవార్డు
2024: భద్రాద్రి కొత్తగూడెం జిల్లా కలెక్టర్ చేతుల మీదుగా సహాయ సేవక్ అవార్డు
2024: గుడ్ సమార్టన్ థియోలాజికల్ సెమినరీ అండ్ యూనివర్సిటీ ద్వారా గౌరవ డాక్టరేట్
2024: మనం ఫౌండేషన్ ఇంటర్నేషనల్ సంస్థ వారిచే జాతీయ ఉత్తమ సేవా నంది అవార్డు
రెండు దశాబ్దాలుగా ఎలాంటి ప్రతిఫలాపేక్ష లేకుండా కొనసాగిస్తున్న సామాజిక సేవకు గుర్తింపుగా నేతన్న టీవీ అవార్డుకు ఎంపిక కావడం పట్ల నీలి ప్రకాష్‌ను పలువురు అభినందించారు. ఈ అవార్డు తనపై మరింత బాధ్యతను పెంచిందని, భవిష్యత్తులోనూ పేదలు, నిరుపేద విద్యార్థులు, ఆదివాసీలు, ఆపదలో ఉన్న వారికి తన సేవలను కొనసాగిస్తానని ఆయన తెలిపారు.
