నవపక్షం, నాంపల్లి మండల ప్రతినిధి :
మండలంలోని తుమ్మలపల్లి గ్రామంలో ఎండిపోయిన వరి పంట పొలాలను వ్యవసాయ విస్తరణ అధికారి సాయికుమార్ సందర్శించి పరిశీలించారు. పంట నష్టానికి సంబంధించిన వివరాలను ఫొటోల రూపంలో నమోదు చేసి ఆన్‌లైన్‌లో అప్‌లోడ్ చేశారు.
ఈ సందర్భంగా వ్యవసాయ విస్తరణ అధికారి సాయి మాట్లాడుతూ, గ్రామంలో ఇతర రైతులకు కూడా వరి పంట ఎండిపోయినట్లయితే వెంటనే వ్యవసాయ విస్తరణ అధికారిని సంప్రదించి పంట నష్టం వివరాలను నమోదు చేయించుకోవాలని సూచించారు. ఎల్‌నినో ప్రభావం కారణంగా రానున్న యాసంగి సీజన్‌లో వరి సాగుకు బదులుగా నీటి అవసరం తక్కువగా ఉండే ఆరుతడి పంటలను ప్రత్యామ్నాయంగా సాగు చేయాలని రైతులకు సూచించారు.
ఈ కార్యక్రమంలో తుమ్మలపల్లి గ్రామ సర్పంచ్ ఆకిటి ప్రమీలమ్మ మహేష్, రైతులు బుచ్చయ్య, కృష్ణయ్య, వెంకటయ్య తదితరులు పాల్గొన్నారు.
