నవపక్షం, నల్లబెల్లి ప్రతినిధి:
నల్లబెల్లి మండలంలో వర్షాభావ పరిస్థితుల కారణంగా చెరువులు, కుంటల్లో నీరు లేక, భూగర్భ జలాలు అడుగంటడంతో బావులు, బోర్లు ఎండిపోయి పంటలు ఎండిపోతున్నాయని బీఆర్ఎస్ యువజన నాయకుడు పోగుల చిరంజీవి యాదవ్ ఆవేదన వ్యక్తం చేశారు. వర్షాలు సకాలంలో కురవకపోవడంతో రైతులు సాగు చేసిన పంటలకు నీరందక తీవ్ర ఇబ్బందులు ఎదుర్కొంటున్నారని తెలిపారు. పంటల సాగు కోసం పెట్టుబడులు పెట్టిన రైతులు పంటలు ఎండిపోవడంతో ఆర్థికంగా నష్టపోతున్నారని, అప్పులు ఎలా తీర్చాలో తెలియక ఆందోళన చెందుతున్నారని పేర్కొన్నారు.
మండలంలోని పలు గ్రామాల్లో భూగర్భ జలాలు తగ్గిపోవడంతో వ్యవసాయానికి నీటి కొరత ఏర్పడటమే కాకుండా, కొన్ని ప్రాంతాల్లో తాగునీటి సమస్య కూడా తీవ్రంగా మారుతోందని తెలిపారు. పశువులకు సైతం నీరు అందని పరిస్థితులు ఏర్పడుతున్నాయని ఆవేదన వ్యక్తం చేశారు. రైతులు, గ్రామీణ ప్రజలు ఎదుర్కొంటున్న ఈ సమస్యలను ప్రభుత్వం తక్షణమే గుర్తించి పరిష్కారానికి చర్యలు చేపట్టాలని కోరారు.
జిల్లా కలెక్టర్ వెంటనే స్పందించి నల్లబెల్లి మండలంలోని అన్ని గ్రామాల్లో క్షేత్రస్థాయి సర్వే నిర్వహించి, పంట నష్టాన్ని అంచనా వేయాలని పోగుల చిరంజీవి యాదవ్ డిమాండ్ చేశారు. వాస్తవ పరిస్థితులను పరిశీలించి నల్లబెల్లి మండలాన్ని కరువు మండలంగా ప్రకటించేందుకు తగిన చర్యలు తీసుకోవాలని కోరారు. నష్టపోయిన అర్హులైన రైతులకు పంట నష్టపరిహారం అందించి, వారిని ఆర్థికంగా ఆదుకోవాలని ప్రభుత్వాన్ని విజ్ఞప్తి చేశారు.
అదేవిధంగా తాగునీటి సమస్య ఉన్న గ్రామాలను గుర్తించి ట్యాంకర్ల ద్వారా నీటిని సరఫరా చేయాలని, అవసరమైన చోట ప్రత్యామ్నాయ నీటి వనరులను ఏర్పాటు చేయాలని సూచించారు. రైతులకు సాగునీటి సదుపాయాలు కల్పించడంతో పాటు, పశువులకు నీటి కొరత లేకుండా చర్యలు తీసుకోవాలని కోరారు.
రైతుల కష్టాలను ప్రభుత్వం నిర్లక్ష్యం చేయకుండా తక్షణమే స్పందించి నల్లబెల్లి మండలాన్ని కరువు మండలంగా ప్రకటించి, రైతులకు న్యాయం చేయాలని పోగుల చిరంజీవి యాదవ్ డిమాండ్ చేశారు.
