తాజ్పూర్: 80వ భారత స్వాతంత్ర్య దినోత్సవ వేడుకలను తాజ్పూర్ గ్రామంలో శనివారం పండుగ వాతావరణంలో ఘనంగా నిర్వహించారు. గ్రామపంచాయతీ కార్యాలయం వద్ద గౌరవ సర్పంచ్ ర్యాకల సంతోష శ్రీనివాస్ జాతీయ పతాకాన్ని ఆవిష్కరించి వేడుకలను ప్రారంభించారు.
సర్పంచ్ అధ్యక్షతన గ్రామపంచాయతీ ఆవరణలో ప్రభుత్వ ఆదేశాల మేరకు తల్లి పాల వారోత్సవ కార్యక్రమాన్ని ఉద్దేశించి గ్రామసభ నిర్వహించిన అనంతరం స్వాతంత్ర్య దినోత్సవ వేడుకలు ప్రారంభమయ్యాయి.
అనంతరం గ్రామంలోని అంగన్వాడీ కేంద్రం, గాంధీ చౌరస్తా, వివిధ యువజన సంఘాల ఆధ్వర్యంలో పలుచోట్ల జాతీయ పతాకాలను ఆవిష్కరించారు. అనంతరం స్థానిక MPUP పాఠశాలలోని కళాతోరణంలో 80వ స్వాతంత్ర్య దినోత్సవాన్ని పురస్కరించుకొని సభా కార్యక్రమాన్ని నిర్వహించారు.
ఈ కార్యక్రమానికి గ్రామ సర్పంచ్ శ్రీమతి, శ్రీ ర్యాకల సంతోష శ్రీనివాస్, పాఠశాల శాశ్వత దాత, సామాజికవేత్త డాక్టర్ ర్యాకల శ్రీనివాస్ ముఖ్య అతిథులుగా హాజరయ్యారు.
స్వాతంత్ర్య సమరయోధుల త్యాగాలను స్మరించుకోవాలి
ఈ సందర్భంగా సర్పంచ్ ర్యాకల సంతోష శ్రీనివాస్ మాట్లాడుతూ, ఎందరో మహనీయుల త్యాగాల ఫలితమే మనకు లభించిన స్వాతంత్ర్యమని అన్నారు. కుల, మత, ప్రాంతీయ భేదాలకు అతీతంగా దేశవ్యాప్తంగా జరుపుకునే గొప్ప పండుగ స్వాతంత్ర్య దినోత్సవమని పేర్కొన్నారు.
స్వాతంత్ర్య సమరయోధుల అడుగుజాడల్లో ప్రతి ఒక్కరూ నడుస్తూ సమాజం పట్ల తమ వంతు కర్తవ్యాన్ని, బాధ్యతను నిర్వర్తించాలని పిలుపునిచ్చారు. మహాత్మా గాంధీ చెప్పినట్లు గ్రామాలే దేశానికి పట్టుకొమ్మలని, గ్రామ స్వరాజ్యం సాధించినప్పుడే దేశ అభివృద్ధి సంపూర్ణమవుతుందని అన్నారు.
గ్రామాలు అన్ని రంగాల్లో అభివృద్ధి చెందినప్పుడే దేశాభివృద్ధి సాధ్యమవుతుందని, స్వాతంత్ర్య సమరయోధుల కలలు సాకారం అవుతాయని తెలిపారు. దేశ అభివృద్ధిలో యువత కీలక పాత్ర పోషించాలని, గ్రామాభివృద్ధికి గ్రామ ప్రజల సహకారం ఎంతో అవసరమని అన్నారు.
తాజ్పూర్ ప్రభుత్వ పాఠశాలలో అన్ని రకాల సౌకర్యాలతో అధునాతన పద్ధతుల్లో విద్యాబోధన జరుగుతోందని, విద్యార్థులు ఈ అవకాశాలను సద్వినియోగం చేసుకొని తమ బంగారు భవిష్యత్తుకు బాటలు వేసుకోవాలని సూచించారు. పాఠశాల అభివృద్ధికి, గ్రామ అభివృద్ధికి తనవంతు సహాయ సహకారాలు ఎల్లప్పుడూ అందిస్తానని తెలిపారు.
ప్రభుత్వ పాఠశాలలో కార్పొరేట్ స్థాయి వసతులు
పాఠశాల శాశ్వత దాత, సామాజికవేత్త డాక్టర్ ర్యాకల శ్రీనివాస్ మాట్లాడుతూ, ప్రభుత్వ పాఠశాలలో ప్రైవేట్ పాఠశాలలకు దీటుగా నాణ్యమైన విద్య అందించాలనే లక్ష్యంతో అధునాతన పద్ధతుల్లో, కార్పొరేట్ స్థాయి వసతులతో పాఠశాలను పునరుద్ధరించినట్లు తెలిపారు.
ప్రతి పేద విద్యార్థికి నాణ్యమైన విద్య అందించాలనే ఉద్దేశంతో నిష్ణాతులైన ఉపాధ్యాయ బృందం ద్వారా విద్యాబోధనతో పాటు విద్యార్థులకు రవాణా సౌకర్యం, నోటుపుస్తకాల పంపిణీ, యూనిఫామ్లు, నాణ్యమైన మధ్యాహ్న భోజనం వంటి సౌకర్యాలను తమ RSK ఫౌండేషన్ ద్వారా అందిస్తున్నట్లు వెల్లడించారు.
ఆకట్టుకున్న సాంస్కృతిక కార్యక్రమాలు
స్వాతంత్ర్య దినోత్సవ వేడుకల్లో భాగంగా విద్యార్థినీ, విద్యార్థులు నిర్వహించిన వివిధ సాంస్కృతిక కార్యక్రమాలు, దేశభక్తి ప్రదర్శనలు ఆకట్టుకున్నాయి. పాలకవర్గ సభ్యులు, యువజన సంఘాల నాయకులు, గ్రామ పెద్దలు స్వాతంత్ర్య దినోత్సవ ప్రాధాన్యతను వివరిస్తూ ప్రసంగించారు.
ఈ కార్యక్రమంలో ఉపసర్పంచ్ వరిగంటి కృష్ణ, పంచాయతీ కార్యదర్శి నర్సింగ్ రావు, ప్రధానోపాధ్యాయులు వెంకటేశ్వర్లు, ఏఏపీసీ చైర్మన్ వరిగంటి రమ్య, వైస్ చైర్మన్ బొమ్మారపు అనురాధ, వార్డు సభ్యులు పల్లెపాటి కృష్ణ, మహమ్మద్ గాలిబీ యాకుబ్, బొమ్మారపు రామకృష్ణ, బొమ్మారపు లక్ష్మీ బాలరాజు, బీట్కూరి మహేష్, వరిగంటి మానస నాగరాజు, షేక్ అహ్మద్, ఉపాధ్యాయ బృందం, ఎఫ్ఏ పల్లెపాటి రామస్వామి, అంగన్వాడీ టీచర్ ఊర్మిళ, ఆశ కార్యకర్త అరుణ, గ్రామ పెద్దలు, పురప్రముఖులు, యువజన సంఘాల నాయకులు, మహిళలు, విద్యార్థుల తల్లిదండ్రులు, సిబ్బంది, గ్రామ ప్రజలు, ప్రింట్ మరియు ఎలక్ట్రానిక్ మీడియా ప్రతినిధులు తదితరులు పాల్గొన్నారు.
గ్రామమంతా దేశభక్తి నినాదాలు, జాతీయ పతాకాలతో సందడిగా మారగా, స్వాతంత్ర్య దినోత్సవ వేడుకలు ఉత్సాహభరిత వాతావరణంలో ఘనంగా ముగిశాయి.
