నారాయణపేట: దివంగత మాజీ ఎమ్మెల్యే, మాజీ ఎమ్మెల్సీ, ప్రజా నాయకుడు చిట్టెం నర్సిరెడ్డి వర్ధంతి సందర్భంగా ఆయన కుమార్తె, ఎంపీ డీకే అరుణ ఘనంగా నివాళులర్పించారు. చిట్టెం నర్సిరెడ్డి విగ్రహానికి పూలమాలలు వేసి నివాళులర్పించిన అనంతరం, చిట్టెం నర్సిరెడ్డి స్మృతి వనం వద్ద పుష్పాంజలి ఘటించారు.
ఈ సందర్భంగా ఎంపీ డీకే అరుణ మాట్లాడుతూ, ప్రజా నాయకుడు చిట్టెం నర్సిరెడ్డి నారాయణపేట జిల్లాతో పాటు ఉమ్మడి పాలమూరు జిల్లా ప్రజల సంక్షేమం, అభివృద్ధి కోసం అహర్నిశలు కృషి చేశారని గుర్తుచేశారు. ప్రజా జీవితానికే అంకితమై, ప్రజల కోసం పనిచేస్తూ ప్రాణాలు కోల్పోయిన గొప్ప నాయకుడని కొనియాడారు.
ఉమ్మడి పాలమూరు జిల్లా ప్రజల సంక్షేమం, అభివృద్ధి, ప్రజా శ్రేయస్సు కోసం తన తండ్రి తుది శ్వాస వరకు కృషి చేశారని అన్నారు. ఆయనను నక్సలైట్ల కాల్పుల్లో కోల్పోవడం తమ కుటుంబంతో పాటు నియోజకవర్గ ప్రజలకు తీరని లోటని ఆవేదన వ్యక్తం చేశారు.
చిట్టెం నర్సిరెడ్డి ఆశయాలను ముందుకు తీసుకెళ్లడమే తన లక్ష్యమని, ఆయన ఆశయ సాధన కోసం నిరంతరం కృషి చేస్తానని ఎంపీ డీకే అరుణ స్పష్టం చేశారు.
2005 ఆగస్టు 15న స్వాతంత్ర్య దినోత్సవ వేడుకల్లో పాల్గొన్న సమయంలో ప్రజా నాయకుడు చిట్టెం నర్సిరెడ్డి నక్సలైట్ల కాల్పుల్లో దారుణంగా హత్యకు గురయ్యారని, ఆయన మరణం ప్రజల గుండెల్లో నేటికీ మానని గాయంగా మిగిలిపోయిందని అన్నారు.
చిట్టెం నర్సిరెడ్డి మక్తల్ నియోజకవర్గం నుంచి మూడు సార్లు ఎమ్మెల్యేగా, రెండు సార్లు ఎమ్మెల్సీగా సేవలందిస్తూ ఈ ప్రాంత అభివృద్ధికి, ప్రజా సంక్షేమానికి విశేష కృషి చేశారని ఎంపీ డీకే అరుణ కొనియాడారు.
వర్ధంతి సందర్భంగా చిట్టెం నర్సిరెడ్డిని స్మరించుకునేందుకు అభిమానులు, కార్యకర్తలు, వివిధ పార్టీల నాయకులు, ప్రజలు పెద్ద సంఖ్యలో తరలివచ్చి ఘన నివాళులర్పించారు.
