విజయనగరం నగర పరిధిలో కేసు దర్యాప్తు నిమిత్తం వెళ్తున్న పోలీసు వాహనం ప్రమాదానికి గురికావడం అత్యంత దురదృష్టకరమని రాష్ట్ర ఎం.ఎస్.ఎం.ఈ, సెర్ప్, ఎన్.ఆర్.ఐ సాధికారత & సంబంధాల శాఖ మంత్రి కొండపల్లి శ్రీనివాస్ అన్నారు. ఈ ప్రమాదంలో కానిస్టేబుల్ ఎస్. వెంకట రమణ మృతి చెందడం తీవ్రంగా కలచివేసిందని తెలిపారు.
విధి నిర్వహణలో ప్రాణాలు కోల్పోయిన కానిస్టేబుల్ వెంకట రమణ కుటుంబానికి మంత్రి తన ప్రగాఢ సానుభూతి తెలిపారు.
ప్రమాదం జరిగిన విషయం తెలిసిన వెంటనే ఎస్పీ దామోదర్ తో వివరాలు తెలుసుకున్నానని మంత్రి తెలిపారు. అనంతరం మెడికవర్ ఆసుపత్రికి చేరుకుని చికిత్స పొందుతున్న ఎస్సై అశోక్ కుమార్, హెడ్ కానిస్టేబుల్ నాగేంద్ర ప్రసాద్, కానిస్టేబుల్ రాజబాబు గార్లను పరామర్శించి, వారి ఆరోగ్య పరిస్థితిని అడిగి తెలుసుకున్నానన్నారు. బాధిత కుటుంబ సభ్యులతో మాట్లాడి వారికి ధైర్యం కల్పించినట్లు తెలిపారు.
గాయపడిన పోలీసు సిబ్బందికి మెరుగైన వైద్యం అందేలా వైద్యులను ఆదేశించడంతో పాటు, పోలీసు కుటుంబాలకు ప్రభుత్వం, పోలీసు శాఖ అన్ని విధాలా అండగా ఉంటుందని మంత్రి భరోసా ఇచ్చారు.
ఈ ప్రమాద ఘటన వివరాలను గౌరవ ముఖ్యమంత్రి నారా చంద్రబాబు నాయుడు కి , హోం మంత్రి శ్రీమతి వంగలపూడి అనిత కి వివరించినట్లు మంత్రి తెలిపారు.
గాయపడిన పోలీసు సిబ్బంది త్వరగా కోలుకోవాలని, మృతుడు వెంకట రమణ కుటుంబానికి భగవంతుడు మనోధైర్యాన్ని ప్రసాదించాలని ప్రార్థిస్తున్నానని మంత్రి కొండపల్లి శ్రీనివాస్ పేర్కొన్నారు.
