నవపక్షం, విజయనగరం జిల్లా ప్రతినిధి :
విజయనగరం జిల్లాకు జాతీయ స్థాయిలో గుర్తింపు తీసుకొచ్చిన జాతీయ ఉత్తమ ఉపాధ్యాయ అవార్డు గ్రహీత కౌలూరి రాజేష్ను రాష్ట్ర ఎం.ఎస్.ఎం.ఈ, సెర్ప్, మరియు ఎన్.ఆర్.ఐ సాధికారత & సంబంధాల శాఖ మంత్రి కొండపల్లి శ్రీనివాస్ ఘనంగా సత్కరించారు.
నెల్లిమర్ల చిన్నమల్లుపేట ఎంపీపీ పాఠశాలలో ఉపాధ్యాయుడిగా పనిచేస్తూ, విద్యాబోధనలో సాంకేతికతను సమర్థవంతంగా వినియోగిస్తున్న రాజేష్ సేవలు అభినందనీయమని మంత్రి పేర్కొన్నారు. ముఖ్యంగా ఆర్టిఫిషియల్ ఇంటెలిజెన్స్ (AI), వాట్సాప్ ఆటోమేషన్ వంటి ఆధునిక సాంకేతిక విధానాలను విద్యారంగంలో వినియోగిస్తూ వేలాది మంది విద్యార్థులు, ఉపాధ్యాయులకు ప్రయోజనం చేకూర్చడం ప్రశంసనీయమన్నారు.
ప్రభుత్వ పాఠశాలల్లో చదువుతున్న పేద, బడుగు, బలహీన వర్గాల విద్యార్థులకు నాణ్యమైన విద్యను అందించి, వారి భవిష్యత్తుకు బాటలు వేయడంలో రాజేష్ కృషి ఎంతో స్ఫూర్తిదాయకమని మంత్రి కొండపల్లి శ్రీనివాస్ అన్నారు.
రాజేష్ను ఆదర్శంగా తీసుకుని ప్రతి ఉపాధ్యాయుడు బాధ్యతతో పనిచేస్తూ విద్యార్థులకు బంగారు భవిష్యత్తును అందించేందుకు కృషి చేయాలని మంత్రి ఆకాంక్షించారు. విజయనగరం జిల్లాకు జాతీయ స్థాయిలో గుర్తింపు తీసుకొచ్చిన కౌలూరి రాజేష్కు మంత్రి అభినందనలు తెలిపారు.
