నవపక్షం, హైదరాబాద్, సెప్టెంబర్ 1:
పర్యావరణ పరిరక్షణ, హరితహారం విస్తరణ లక్ష్యంగా మాజీ రాజ్యసభ సభ్యులు, గ్రీన్ ఇండియా ఛాలెంజ్ వ్యవస్థాపకులు జోగినపల్లి సంతోష్ కుమార్ తీసుకొచ్చిన వినూత్న కార్యక్రమంలో భాగంగా రూపొందించిన విత్తన గణపతిని మల్లారెడ్డి విద్యాసంస్థల వైస్ చైర్మన్ ప్రీతి రెడ్డికి గ్రీన్ ఇండియా ఛాలెంజ్ రాష్ట్ర కోఆర్డినేటర్ గర్రెపల్లి సతీష్ అందజేశారు.
ఈ సందర్భంగా గర్రెపల్లి సతీష్ మాట్లాడుతూ పర్యావరణ పరిరక్షణపై ప్రజల్లో అవగాహన పెంపొందించడంతో పాటు, పర్యావరణహిత పద్ధతులను ప్రోత్సహించడమే విత్తన గణపతి కార్యక్రమం ప్రధాన ఉద్దేశమని తెలిపారు. వినాయక చవితి అనంతరం విత్తన గణపతిని నాటడం ద్వారా మొక్కను పెంచి, భవిష్యత్ తరాలకు పచ్చని వాతావరణాన్ని అందించవచ్చని పేర్కొన్నారు.
జోగినపల్లి సంతోష్ కుమార్ ఆధ్వర్యంలో గ్రీన్ ఇండియా ఛాలెంజ్ ద్వారా పర్యావరణ పరిరక్షణకు చేపడుతున్న కార్యక్రమాలు ప్రజల్లో స్ఫూర్తిని నింపుతున్నాయని, ప్రతి ఒక్కరూ పర్యావరణహిత వినాయక విగ్రహాలను ప్రోత్సహించి ప్రకృతి పరిరక్షణలో భాగస్వాములు కావాలని ఆయన పిలుపునిచ్చారు.
ఈ కార్యక్రమంలో మల్లారెడ్డి విద్యాసంస్థల ప్రతినిధులు, గ్రీన్ ఇండియా ఛాలెంజ్ సభ్యులు తదితరులు పాల్గొన్నారు.
