నవపక్షం, బాన్సువాడ ప్రతినిధి :
వినాయక నిమజ్జన కార్యక్రమాన్ని భక్తిశ్రద్ధలతో, ప్రశాంత వాతావరణంలో నిర్వహించేందుకు ప్రతి ఒక్కరూ సహకరించాలని రాష్ట్ర ఆగ్రోస్ ఇండస్ట్రీస్ చైర్మన్ కాసుల బాలరాజు కోరారు.
వినాయక నవరాత్రి ఉత్సవాల అనంతరం నిర్వహించనున్న నిమజ్జన కార్యక్రమానికి సంబంధించి బాన్సువాడ పట్టణంలో పాత బాన్సువాడ చావిడి నుంచి కల్కి చెరువు వరకు నిమజ్జన రూట్ను జిల్లా ఎస్పీతో పాటు వివిధ శాఖల అధికారులతో కలిసి కాసుల బాలరాజు క్షేత్రస్థాయిలో పరిశీలించారు.
ఈ సందర్భంగా నిమజ్జన రూట్లో భక్తులకు ఎలాంటి ఇబ్బందులు కలగకుండా చేపట్టాల్సిన ఏర్పాట్లపై అధికారులతో చర్చించారు. ట్రాఫిక్ నియంత్రణ, పోలీసు బందోబస్తు, విద్యుత్ సౌకర్యాలు, పారిశుద్ధ్యం, తాగునీరు, రహదారి నిర్వహణ, నిమజ్జన ప్రదేశంలో భద్రతా చర్యలు తదితర అంశాలపై సమీక్షించారు.
కాసుల బాలరాజు మాట్లాడుతూ.. వినాయక నిమజ్జన కార్యక్రమం సజావుగా జరిగేందుకు ఉత్సవ కమిటీలు, భక్తులు పోలీసు, మున్సిపల్, రెవెన్యూ తదితర శాఖల అధికారులకు సహకరించాలని విజ్ఞప్తి చేశారు. ప్రజలకు ఎలాంటి అసౌకర్యం కలగకుండా ముందస్తు ఏర్పాట్లు పూర్తి చేయాలని అధికారులను కోరారు.
నిమజ్జన కార్యక్రమం ఎలాంటి అవాంఛనీయ ఘటనలకు తావులేకుండా ప్రశాంతంగా నిర్వహించేందుకు అన్ని శాఖలు సమన్వయంతో పనిచేయాలని సూచించారు.
ఈ కార్యక్రమంలో గంగాధర్, కృష్ణారెడ్డి, మాసాని శ్రీనివాస్ రెడ్డి, అబ్దుల్ ఖలేఖ్, గోపాల్ రెడ్డి, వెంకన్న, శివదయాళ్, ఎజాస్, వాహబ్, లింగమేశ్వర్ తదితరులతో పాటు పోలీసు, మున్సిపల్, రెవెన్యూ, విద్యుత్, ఆర్అండ్బీ శాఖల అధికారులు, సిబ్బంది పాల్గొన్నారు.
