నవపక్షం, గూడూర్ ప్రతినిధి :
ప్రధానమంత్రి నరేంద్ర మోదీ జన్మదిన వేడుకలను పురస్కరించుకుని నిర్వహిస్తున్న సేవా సంకల్ప్ అభియాన్ – వికసిత్ భారత్ మన సంకల్పం కార్యక్రమంలో భాగంగా కోట మండలంలో బీజేపీ ఆధ్వర్యంలో వివిధ సేవా కార్యక్రమాలు కొనసాగుతున్నాయి.
ఇందులో భాగంగా మంగళవారం కోట మండల కేంద్రంలోని జిల్లా పరిషత్ బాలికల ఉన్నత పాఠశాల, ఏవీకేఆర్ బాలుర ఉన్నత పాఠశాలలో విద్యార్థులకు చిత్రలేఖనం పోటీలు నిర్వహించారు.
బీజేపీ కోట మండల అధ్యక్షుడు గునుపూడి హరిబాబు ఆధ్వర్యంలో నిర్వహించిన ఈ పోటీల్లో విద్యార్థులు ఉత్సాహంగా పాల్గొని తమ సృజనాత్మక ప్రతిభను ప్రదర్శించారు. విద్యార్థులను మూడు విభాగాలుగా విభజించి చిత్రలేఖనం పోటీలు నిర్వహించారు. ప్రతి విభాగంలో ప్రతిభ కనబరిచిన విద్యార్థులకు ప్రథమ, ద్వితీయ, తృతీయ బహుమతులు అందజేశారు.
రెండు పాఠశాలల్లో నిర్వహించిన పోటీల్లో విజేతలుగా నిలిచిన 15 మంది విద్యార్థిని, విద్యార్థులకు గునుపూడి హరిబాబు తన సొంత నిధులతో మెమొంటోలు, బహుమతులు అందజేసి అభినందించారు.
ఈ సందర్భంగా గునుపూడి హరిబాబు మాట్లాడుతూ, విద్యార్థుల్లో దాగి ఉన్న ప్రతిభను గుర్తించి ప్రోత్సహించాలనే ఉద్దేశంతో చిత్రలేఖనం పోటీలు నిర్వహించినట్లు తెలిపారు.
దేశ అభివృద్ధితో పాటు విద్యార్థులు, యువతలో ప్రతిభను వెలికితీయడం, వారిలో ఆత్మవిశ్వాసాన్ని పెంపొందించడం వంటి అంశాలకు ప్రాధాన్యత ఇవ్వాలన్నారు. వికసిత్ భారత్ నిర్మాణంలో నేటి విద్యార్థులే రేపటి దేశ భవిష్యత్తుకు బలమైన పునాదులని పేర్కొన్నారు.
ప్రధానమంత్రి నరేంద్ర మోదీ జన్మదిన వేడుకలను కేవలం వేడుకలకే పరిమితం చేయకుండా సేవా కార్యక్రమాలకు వేదికగా నిర్వహించాలనే ఉద్దేశంతో ఈ కార్యక్రమాలను చేపడుతున్నట్లు తెలిపారు.
విద్యార్థుల ప్రతిభను గుర్తించి వారిని ప్రోత్సహించడం కూడా సమాజానికి చేసే సేవలో భాగమేనని అన్నారు. చిన్న వయసులో విద్యార్థులకు అందించే ప్రోత్సాహం వారి భవిష్యత్తులో గొప్ప ప్రేరణగా నిలుస్తుందని పేర్కొన్నారు.
విద్యార్థులు చదువుతో పాటు కళలు, క్రీడలు, సాంస్కృతిక కార్యక్రమాల్లోనూ చురుగ్గా పాల్గొనాలని గునుపూడి హరిబాబు సూచించారు. ప్రతిభ కలిగిన విద్యార్థులను ప్రోత్సహించేందుకు తన వంతు సహకారం ఎల్లప్పుడూ అందిస్తానని తెలిపారు.
ఈ కార్యక్రమంలో బీజేపీ నాయకులు ఎల్. వెంకటేశ్వర్లు, విశ్వనాథ్, సాయి, చంద్రసేన కుమారి, పరుశురాం తదితరులు పాల్గొని విజేతలైన విద్యార్థులను అభినందించారు. పాఠశాలల ఉపాధ్యాయులు, విద్యార్థులు కార్యక్రమంలో పాల్గొన్నారు.
