నవపక్షం, జనగామ ప్రతినిధి :
యువజన కాంగ్రెస్ జాతీయ అధ్యక్షులు ఉదయభాను చిబ్ ఆదేశాల మేరకు జ్ఞానేష్ కుమార్ ను అరెస్ట్ చేయాలని డిమాండ్ చేస్తూ తెలంగాణ యువజన కాంగ్రెస్ ఆధ్వర్యంలో జనగామ జిల్లా కేంద్రంలో భారీ నిరసన కార్యక్రమం చేపట్టారు.
ఈ కార్యక్రమానికి యువజన కాంగ్రెస్ రాష్ట్ర సహాయ ఇన్చార్జ్ కె.ఆర్. భవ్యతో కలిసి యువజన కాంగ్రెస్ రాష్ట్ర అధ్యక్షులు జక్కిడి శివచరణ్ రెడ్డి ముఖ్య అతిథిగా పాల్గొని మాట్లాడారు.
ఈ సందర్భంగా శివచరణ్ రెడ్డి మాట్లాడుతూ ఎలక్షన్ కమీషన్ SIR పేరుతో దాదాపు దేశవ్యాప్తంగా 13 కోట్లకు పైగా ఓటర్ల పేర్లు డ్రాఫ్ట్ ఓటర్ జాబితాల నుంచి తొలగించి బీజేపీ గెలుపుకు పరోక్షంగా సహకరిస్తున్నారని విమర్శించారు. ఈ వ్యవహారంపై ఎన్నికల కమిషన్లోని సభ్యులు అభ్యంతరాలు వ్యక్తం చేసినప్పటికీ, చీఫ్ ఎలక్షన్ కమిషనర్ జ్ఞానేష్ కుమార్ బీజేపీ ఏజెంట్గా మారి ఓట్లను తొలగిస్తూ బీజేపీకి లబ్ధి చేకూరుస్తున్నారని విమర్శించారు.
అంతేకాకుండా ఫామ్-6లో కొత్త నిబంధనలు చేర్చి, ఎన్నికల కమిషన్ను బీజేపీ జేబు సంస్థగా మార్చి ఓటు చోరీకి పాల్పడుతున్నారని ఆయన తీవ్రంగా విమర్శించారు.
తక్షణమే చీఫ్ ఎలక్షన్ కమిషనర్ జ్ఞానేష్ కుమార్ ను అరెస్ట్ చేయాలని యువజన కాంగ్రెస్ రాష్ట్ర అధ్యక్షులు జక్కిడి శివచరణ్ రెడ్డి డిమాండ్ చేశారు.
ఈ కార్యక్రమంలో యువజన కాంగ్రెస్ జిల్లా అధ్యక్షులు క్రాంతి కుమార్, యువజన కాంగ్రెస్ రాష్ట్ర ప్రధాన కార్యదర్శులు అల్వాల కార్తీక్, చంద్రిక గౌడ్, ఉపాధ్యక్షులు కమలాకర్, జిల్లా ప్రధాన కార్యదర్శులు మహేశ్, బాబా, సంపత్, నియోజకవర్గాల అధ్యక్షులు రాజేష్ నాయక్, సంతోష్ రెడ్డి తదితరులు పాల్గొన్నారు.
