నవపక్షం, మద్నూర్ ప్రతినిధి :
కామారెడ్డి జిల్లా మద్నూర్ మండల పరిధిలోని సోమూర్ గ్రామంలో దేవీ శరన్నవరాత్రి ఉత్సవాలను ఘనంగా నిర్వహించేందుకు గ్రామ దుర్గామాత ఉత్సవ కమిటీ సన్నాహాలు ప్రారంభించింది. ఇందులో భాగంగా మండప ఏర్పాటు, దుర్గామాత విగ్రహ ప్రతిష్ఠాపనకు అనుమతి కోరుతూ మద్నూర్ పోలీస్ స్టేషన్‌లో కమిటీ సభ్యులు తొలి వినతిపత్రాన్ని సమర్పించారు.
ఈ మేరకు దుర్గామాత ఉత్సవ కమిటీ అధ్యక్షుడు నరసింహులు, కమిటీ సభ్యుడు ఆనంద్‌తో పాటు ఇతర ప్రతినిధులు మద్నూర్ పోలీస్ స్టేషన్‌కు వెళ్లి సబ్‌ ఇన్‌స్పెక్టర్ మోహన్‌ను కలిసి అనుమతి పత్రాన్ని అందజేశారు.
ఈ సందర్భంగా కమిటీ ప్రతినిధులు మాట్లాడుతూ పోలీస్ శాఖ సూచించిన నియమ నిబంధనలను తప్పనిసరిగా పాటిస్తామని తెలిపారు. ఎలాంటి అవాంఛనీయ సంఘటనలకు తావులేకుండా గ్రామ ప్రజల సహకారంతో ప్రశాంత వాతావరణంలో భక్తిశ్రద్ధలతో ఉత్సవాలను నిర్వహిస్తామని పేర్కొన్నారు.
దీనిపై ఎస్‌ఐ మోహన్ స్పందిస్తూ గ్రామ ప్రజలు, ఉత్సవ కమిటీ సభ్యులు సమన్వయంతో వ్యవహరించి శరన్నవరాత్రి ఉత్సవాలను ప్రశాంతంగా నిర్వహించుకోవాలని సూచించారు.
