నవపక్షం, హైదరాబాద్, ప్రతినిధి :
ఉస్మానియా యూనివర్సిటీలోని మోయిన్ చెరువు సమీపంలో ఉన్న కట్టమైసమ్మ అమ్మవారి ఆలయానికి సంబంధించిన గేట్లు ధ్వంసమైనట్లు, అమ్మవారి విగ్రహం, హారతి సామగ్రి, గంటలు, నైవేద్య పాత్రలు కనిపించకుండా పోయినట్లు వస్తున్న సమాచారం తీవ్ర ఆందోళన కలిగిస్తోందని ఏబీవీపీ జాతీయ కార్యవర్గ సభ్యులు జీవన్ పేర్కొన్నారు.
ఈ ఘటనకు సంబంధించి వాస్తవాలను నిర్ధారించేందుకు పోలీసులు తక్షణమే సమగ్ర విచారణ చేపట్టాలని, అందుబాటులో ఉన్న సీసీటీవీ ఫుటేజీ, ఇతర ఆధారాలను పరిశీలించి, బాధ్యులుగా గుర్తించిన వారిపై చట్టప్రకారం చర్యలు తీసుకోవాలని ఆయన డిమాండ్ చేశారు. అలాగే, ఘటనకు సంబంధించిన ఫొటోలు, ఇతర ఆధారాల ప్రచారాన్ని అడ్డుకుంటున్నారనే ఆరోపణలపై కూడా అధికారులు స్పష్టత ఇవ్వాలని కోరారు.
విశ్వవిద్యాలయ ప్రాంగణంలో ఉన్న ప్రార్థనా స్థలాల భద్రత, విద్యార్థుల ఆస్తిక భావాలు, మతపరమైన విశ్వాసాలకు గౌరవం కల్పించడం సంబంధిత అధికారుల బాధ్యతని జీవన్ పేర్కొన్నారు. ఈ ఘటనపై ఎలాంటి పక్షపాతం లేకుండా, పారదర్శకంగా విచారణ జరిపి, వాస్తవాలను ప్రజలకు వెల్లడించాలని డిమాండ్ చేశారు.
24 గంటల్లో బాధ్యులను గుర్తించి, చట్టప్రకారం అరెస్టు చర్యలు చేపట్టాలి
కట్టమైసమ్మ అమ్మవారి ఆలయానికి సంబంధించిన ఘటనలో బాధ్యులను 24 గంటల్లో గుర్తించి, చట్టప్రకారం తగిన చర్యలు తీసుకోవాలని జీవన్ పోలీసు అధికారులను డిమాండ్ చేశారు. ఈ గడువులోగా స్పష్టమైన చర్యలు చేపట్టకపోతే, ఉస్మానియా యూనివర్సిటీ నుంచి విద్యార్థులతో కలిసి డీజీపీ కార్యాలయం వద్ద ప్రజాస్వామ్యబద్ధంగా నిరసన కార్యక్రమం చేపడతామని హెచ్చరించారు.
ఈ ఘటనపై అధికారులు తక్షణమే స్పందించి, ఆలయ భద్రతకు అవసరమైన చర్యలు తీసుకోవడంతో పాటు, విచారణ పురోగతిపై ప్రజలకు స్పష్టమైన సమాచారం అందించాలని జీవన్ కోరారు.
