నవపక్షం, కాకినాడ ప్రతినిధి :
కాకినాడ జిల్లా రామచంద్రపురం నియోజకవర్గం, కాజులూరు మండలం ఆర్యవటం శివారు తుమ్మలపల్లి లంకలో గత 15 నెలలుగా రహదారి సమస్య పరిష్కారం కాకపోవడంతో గ్రామానికి చెందిన సుమారు 80 కుటుంబాలు ఎన్నికలను బహిష్కరించాలని నిర్ణయించుకున్నాయి. తక్షణమే రహదారిని పునరుద్ధరించకపోతే ఎన్నికల్లో ఓటు వేసే ప్రసక్తే లేదని గ్రామస్తులు స్పష్టం చేశారు.
గత సార్వత్రిక ఎన్నికల అనంతరం తలెత్తిన వివాదం కారణంగా గ్రామానికి వెళ్లే రహదారిని ధ్వంసం చేయడంతో రాకపోకలు పూర్తిగా నిలిచిపోయాయి. దీంతో గ్రామస్తులు తీవ్ర ఇబ్బందులు ఎదుర్కొంటున్నారు. ముఖ్యంగా సుమారు 300 ఎకరాల్లో వరి సాగు చేస్తున్న రైతులు, వ్యవసాయ కూలీలు తమ పొలాలకు వెళ్లేందుకు, వ్యవసాయ పనులు నిర్వహించేందుకు అనేక అవస్థలు పడుతున్నారు. రహదారి సౌకర్యం లేకపోవడంతో వ్యవసాయ ఉత్పత్తుల రవాణా కూడా కష్టతరంగా మారింది.
ఈ సమస్యను పలుమార్లు ప్రజాప్రతినిధులు, ఉన్నతాధికారులు, సంబంధిత మంత్రి దృష్టికి తీసుకెళ్లినప్పటికీ ఇప్పటివరకు ఎలాంటి పరిష్కారం లభించలేదని గ్రామస్తులు ఆవేదన వ్యక్తం చేస్తున్నారు. 15 నెలలుగా సమస్య కొనసాగుతున్నా అధికారులు స్పందించకపోవడంపై వారు తీవ్ర అసంతృప్తి వ్యక్తం చేస్తున్నారు.
ఇప్పటికైనా సంబంధిత అధికారులు, ప్రజాప్రతినిధులు స్పందించి తుమ్మలపల్లి లంక రహదారిని తక్షణమే పునరుద్ధరించాలని గ్రామస్తులు డిమాండ్ చేశారు. రహదారి సమస్యకు శాశ్వత పరిష్కారం చూపి రాకపోకలను పునరుద్ధరించినప్పుడే ఎన్నికల్లో పాల్గొంటామని, లేనిపక్షంలో ఎన్నికలను బహిష్కరిస్తామని వారు స్పష్టం చేశారు.
