నవపక్షం, దేవరకొండ ప్రతినిధి:
శక్రుతండా గ్రామపంచాయతీ పరిధిలోని బండమీది తండా, మొదలుకుంట తండాలకు వెళ్లే ప్రధాన రహదారి నిర్మాణ పనులను వెంటనే పూర్తి చేయాలని డిమాండ్ చేస్తూ గ్రామ పంచాయతీ యువ నాయకుడు జటావత్ ప్రకాష్ నాయక్ (జె.పి.) ఆధ్వర్యంలో గ్రామస్థులు బిక్షాటన కార్యక్రమం నిర్వహించారు.
గత మూడేళ్లుగా రహదారి నిర్మాణ పనులు అసంపూర్తిగా ఉండటంతో రెండు తండాల ప్రజలు తీవ్ర ఇబ్బందులు ఎదుర్కొంటున్నారని ప్రకాష్ నాయక్ ఆవేదన వ్యక్తం చేశారు. ముఖ్యంగా విద్యార్థులు పాఠశాలలకు వెళ్లేందుకు, వృద్ధులు, గర్భిణులు ఆసుపత్రులకు చేరుకునేందుకు తీవ్ర అవస్థలు పడుతున్నారని తెలిపారు. రైతులు తమ వ్యవసాయ ఉత్పత్తులను తరలించడంలో కూడా ఇబ్బందులు ఎదుర్కొంటున్నారని పేర్కొన్నారు.
వర్షాకాలంలో రహదారి పరిస్థితి మరింత అధ్వానంగా మారి రాకపోకలకు తీవ్ర ఆటంకం కలుగుతోందన్నారు. ప్రజల సమస్యలను ప్రభుత్వం, సంబంధిత అధికారుల దృష్టికి తీసుకెళ్లేందుకే బిక్షాటన రూపంలో వినూత్న నిరసన చేపట్టినట్లు తెలిపారు. ఈ కార్యక్రమానికి గ్రామస్థుల నుంచి విశేష స్పందన లభించిందని పేర్కొన్నారు.
ఇప్పటికైనా అధికారులు స్పందించి రహదారి నిర్మాణ పనులను నిర్లక్ష్యం చేయకుండా వెంటనే పూర్తి చేయాలని, తండాల ప్రజలకు మెరుగైన రవాణా సౌకర్యం కల్పించాలని జటావత్ ప్రకాష్ నాయక్ ప్రభుత్వాన్ని, సంబంధిత అధికారులను డిమాండ్ చేశారు.
