నవపక్షం, కోట ప్రతినిధి :
కోట అంబేడ్కర్ గురుకుల పాఠశాలను తిరిగి ప్రారంభించడంతో పాటు, ప్రస్తుతం కొనసాగుతున్న సెంటర్ ఆఫ్ ఎక్సలెన్స్ (COE)ను వేరే ప్రాంతానికి తరలించి విద్యార్థులకు న్యాయం చేయాలని బహుజన యూత్ ఫోర్స్ నాయకులు ప్రభుత్వాన్ని డిమాండ్ చేశారు.
గత రెండు నెలలుగా కోట అంబేడ్కర్ గురుకుల పాఠశాల మూసివేత చర్యను నిరసిస్తూ తాము వివిధ రూపాల్లో ఆందోళనలు నిర్వహిస్తున్నప్పటికీ ఇప్పటివరకు సమస్య పరిష్కారం కాకపోవడంపై బహుజన యూత్ ఫోర్స్ నాయకులు ఆవేదన వ్యక్తం చేశారు. పాఠశాల మూసివేత కారణంగా విద్యార్థులు ఇబ్బందులు ఎదుర్కొంటున్నప్పటికీ ప్రభుత్వం స్పందించకపోవడం సరికాదన్నారు.
విద్యార్థులకు అవసరమైన వసతులు, విద్యా సౌకర్యాలు అందుబాటులో లేక కొందరు విద్యార్థులు టీసీలు తీసుకుని ఇతర పాఠశాలలకు వెళ్లాల్సిన పరిస్థితి ఏర్పడిందని నాయకులు పేర్కొన్నారు. విద్యార్థుల చదువుకు అంతరాయం కలగకుండా ప్రభుత్వం తక్షణమే చర్యలు తీసుకోవాలని కోరారు.
విద్య ప్రతి విద్యార్థి హక్కు అని, విద్యార్థులకు నాణ్యమైన విద్యను అందించేందుకు ఏర్పాటు చేసిన గురుకుల విద్యా వ్యవస్థను బలోపేతం చేయాల్సిన అవసరం ఉందని నాయకులు అన్నారు. కోట అంబేడ్కర్ గురుకుల పాఠశాల విషయంలో విద్యార్థులు, తల్లిదండ్రుల అభిప్రాయాలను పరిగణనలోకి తీసుకుని ప్రభుత్వం పునరాలోచించాలని కోరారు.
అలాగే ఒకే క్యాంపస్‌లో బాలురు, బాలికలకు సంబంధించిన విద్యా వసతులను నిర్వహించడం వల్ల తలెత్తుతున్న ఇబ్బందులను ప్రభుత్వం పరిశీలించాలని వారు కోరారు. విద్యార్థుల భద్రత, వసతులు, విద్యా వాతావరణాన్ని దృష్టిలో ఉంచుకుని తగిన నిర్ణయం తీసుకోవాలని సూచించారు.
కోట అంబేడ్కర్ గురుకుల పాఠశాలను తిరిగి ప్రారంభించి, సెంటర్ ఆఫ్ ఎక్సలెన్స్‌ను వేరే ప్రాంతానికి తరలించడం ద్వారా విద్యార్థులకు ప్రశాంతమైన విద్యా వాతావరణం కల్పించాలని బహుజన యూత్ ఫోర్స్ నాయకులు డిమాండ్ చేశారు. ప్రభుత్వం వెంటనే స్పందించి సమస్యను పరిష్కరించకపోతే విద్యార్థులు, తల్లిదండ్రులు, ప్రజలతో కలిసి తమ ఆందోళనలను మరింత ఉధృతం చేస్తామని వారు తెలిపారు.
ఈ కార్యక్రమంలో బహుజన యూత్ ఫోర్స్ గౌరవ సలహాదారులు మట్టిగుంట సురేంద్ర, కనుపూరు క్రిష్ణయ్య, మీడియా కో-ఆర్డినేటర్ పాకం చెన్న కేశవులు, లీగల్ అడ్వైజర్ దాసరి అశోక్ కాంబ్లే, కో-కన్వీనర్లు షేక్ సుభాన్, ప్రవీణ్, షేక్ సల్మాన్ తదితరులు పాల్గొన్నారు.
