నవపక్షం, శాలిగౌరారం మండల ప్రతినిధి :
విద్యారంగంలో వినూత్న బోధనా విధానాలను అవలంబిస్తూ, తెలుగు భాషాభివృద్ధికి విశిష్ట సేవలు అందిస్తున్న తెలంగాణ ఆదర్శ పాఠశాల, వల్లాల (శాలిగౌరారం మండలం, నల్గొండ జిల్లా) తెలుగు ఉపాధ్యాయులు కుక్కడపు శ్రీనివాసు ప్రతిష్ఠాత్మక INNOVATION TEACHER AWARDS–ITA 2026 అవార్డును అందుకున్నారు.
హైదరాబాద్‌లోని హరిహర కళాభవన్ వేదికగా జఠాధర ఎడ్యుకేషన్ టెక్నాలజీ (JET) యాజమాన్యం ఆధ్వర్యంలో నిర్వహించిన INNOVATION TEACHER AWARDS–ITA 2026 అవార్డుల ప్రదానోత్సవ కార్యక్రమంలో గౌరవ ముఖ్య అతిథి, తెలంగాణ ఉపాధ్యాయ ఎమ్మెల్సీ పింగళి శ్రీపాల్ రెడ్డి, తెలంగాణ మోడల్ స్కూల్స్ AMO మంజరీ చేతుల మీదుగా కుక్కడపు శ్రీనివాసు ఈ అవార్డును స్వీకరించారు.
తెలుగు భాషా బోధనలో సృజనాత్మక పద్ధతుల వినియోగం, సాంకేతికతను సమర్థవంతంగా అనుసంధానం చేయడం, విద్యార్థుల్లో భాషా నైపుణ్యాలను పెంపొందించడం, పాఠశాల స్థాయిలో చేపట్టిన వినూత్న విద్యా కార్యక్రమాలకు గుర్తింపుగా ఈ అవార్డు లభించింది.
కుక్కడపు శ్రీనివాసు సాధించిన ఈ ప్రతిష్ఠాత్మక పురస్కారం పట్ల వల్లాల ఆదర్శ పాఠశాల ఉపాధ్యాయ బృందం, విద్యార్థులు, తల్లిదండ్రులు, శ్రేయోభిలాషులు, విద్యారంగ ప్రముఖులు అభినందనలు తెలిపారు.
ఈ అవార్డు ఉపాధ్యాయుల సృజనాత్మకతకు, వినూత్న బోధనా విధానాలకు లభించిన గుర్తింపుగా నిలవడంతో పాటు, విద్యార్థుల్లో తెలుగు భాష పట్ల ఆసక్తిని పెంపొందించే దిశగా మరింత ప్రోత్సాహాన్ని అందిస్తుందని పేర్కొన్నారు.
