నవపక్షం, శాలిగౌరారం ప్రతినిధి :
ఐదు దశాబ్దాల క్రితం నిర్మించిన ఇల్లు, నేడు శిథిలావస్థకు చేరింది. ఎప్పుడు కూలిపోతుందో తెలియని ఇంట్లో పేద మహిళలు ప్రాణాలను అరచేతిలో పెట్టుకుని జీవిస్తున్నారు. వర్షం పడితే ఇంట్లో ఉండలేని పరిస్థితి ఏర్పడడంతో చివరకు గ్రామంలోని పీర్ల కొట్టంలో తలదాచుకోవాల్సిన దుస్థితి నెలకొంది. తమ దీనస్థితిని అధికారులు పట్టించుకోవడం లేదంటూ ఇటుకులహాడ్ గ్రామానికి చెందిన గండెల వెంకమ్మ, రేపని పద్మ ఆవేదన వ్యక్తం చేస్తున్నారు.
ఇంటి పైకప్పు పూర్తిగా దెబ్బతినడంతో వర్షం వచ్చిన ప్రతిసారీ నీరు ఇంట్లోకి చేరుతోందని బాధితులు తెలిపారు. గోడలు, పైకప్పు బలహీనంగా మారడంతో ఇంట్లో నిలబడాలన్నా, కూర్చోవాలన్నా భయంగా ఉందని కన్నీటిపర్యంతమయ్యారు. రాత్రివేళ వర్షం పడితే ఎప్పుడు ఏ ప్రమాదం జరుగుతుందోనని బిక్కుబిక్కుమంటూ గడుపుతున్నామని వాపోయారు.
పేదరికం కారణంగా సొంతంగా ఇల్లు నిర్మించుకునే స్థోమత తమకు లేదని, ప్రభుత్వం అందించే గృహ పథకమే తమకు ఏకైక ఆశ అని బాధితులు పేర్కొన్నారు. వర్షం నుంచి రక్షణ కోసం ఇంట్లో ఉండలేక పీర్ల కొట్టంలో తలదాచుకోవాల్సి వస్తోందని ఆవేదన వ్యక్తం చేశారు. కనీసం తమ పరిస్థితిని అధికారులు పరిశీలించి, ప్రమాదకరంగా ఉన్న ఇంటిని గుర్తించి తక్షణ చర్యలు తీసుకోవాలని కోరుతున్నారు.
ప్రాణనష్టం జరిగే వరకు వేచి చూడొద్దు
ప్రస్తుతం ప్రభుత్వం రెండో విడత ఇందిరమ్మ ఇళ్ల కేటాయింపులు చేపడుతున్న నేపథ్యంలో తమలాంటి నిరుపేదలు, శిథిలావస్థలో ఉన్న ఇళ్లలో నివసిస్తున్న కుటుంబాలకు ప్రాధాన్యం ఇవ్వాలని బాధితులు విజ్ఞప్తి చేస్తున్నారు. అర్హతలను పరిశీలించి నిబంధనల ప్రకారం తమకు ఇందిరమ్మ ఇల్లు మంజూరు చేయాలని కోరుతున్నారు.
ఇల్లు పూర్తిగా కూలిపోయి ప్రాణనష్టం సంభవించిన తర్వాత స్పందించకుండా, ముందుగానే అధికారులు క్షేత్రస్థాయిలో పరిస్థితిని పరిశీలించి అవసరమైన రక్షణ చర్యలు చేపట్టాలని బాధితులు కోరుతున్నారు. “కలెక్టర్ సారూ.. మా గోడు పట్టదా? మేము కూడా మనుషులమే.. మా ప్రాణాలకు విలువ లేదా? మా పరిస్థితిని ఒక్కసారి చూసి న్యాయం చేయండి” అంటూ గండెల వెంకమ్మ, రేపని పద్మ కన్నీటితో వేడుకుంటున్నారు.
తక్షణమే సంబంధిత అధికారులు గ్రామాన్ని సందర్శించి శిథిలావస్థలో ఉన్న ఇంటిని పరిశీలించి, అర్హత ఉంటే ఇందిరమ్మ ఇల్లు మంజూరుకు చర్యలు తీసుకోవాలని వారు కోరుతున్నారు.
