నవపక్షం, మద్నూర్ ప్రతినిధి:
మారుమూల గ్రామీణ ప్రాంతం, నిరుపేద కుటుంబ నేపథ్యం నుంచి వచ్చిన మద్నూర్ యువ గాయని గల్కట్వార్ సంధ్యారాణి తన గళంతో ప్రత్యేక గుర్తింపు తెచ్చుకుంటున్నారు. ఆర్థిక ఇబ్బందులను అధిగమిస్తూ చదువును కొనసాగిస్తూనే జానపద కళను నమ్ముకుని ముందుకు సాగుతున్నారు.
మద్నూర్ మండల కేంద్రానికి చెందిన సంధ్యారాణి తండ్రి సాయిలు ఆటో డ్రైవర్ కాగా, తల్లి సవిత వ్యవసాయ కూలీ. కుటుంబ ఆర్థిక పరిస్థితులు అనుకూలంగా లేకపోయినా పట్టుదలతో విద్యను కొనసాగించిన ఆమె 2021లో బిచ్కుందలో బీఈడీ, 2024లో కామారెడ్డి ప్రభుత్వ కళాశాలలో ఎమ్మెస్సీ పూర్తి చేశారు. ప్రస్తుతం ప్రభుత్వ ఉద్యోగం కోసం సన్నద్ధమవుతూనే పాటల రంగంలోనూ తనదైన ముద్ర వేస్తున్నారు.
ఇటీవల రాష్ట్ర ప్రభుత్వం ప్రతిష్టాత్మకంగా చేపట్టిన ‘ఇందిరా మహిళా శక్తి’ పథకంపై రూపొందించిన చైతన్య గీతాన్ని సంధ్యారాణి ఆలపించారు. మహిళా సాధికారతను చాటేలా సాగిన ఈ పాటకు అధికారులు, మహిళా సంఘాల నుంచి ప్రశంసలు లభించాయి.
అంతకుముందు ‘మోగిన నగారా – ఓటరు చైతన్య గీతాలు’ కార్యక్రమం ద్వారా ఓటు ప్రాధాన్యతపై ప్రజల్లో అవగాహన కల్పించే పాటలు ఆలపించారు. తెలంగాణ రచయితల వేదిక, ప్రజా గాయకుడు గద్దర్ రెండో వార్షికోత్సవ మహాసభల్లో పాటలు పాడి విమలక్క చేతుల మీదుగా సత్కారం పొందారు. అలాగే ‘రేలా రే రేలా’ కార్యక్రమంలో ‘బండెనుక బండి కట్టే’ పాటను ఆలపించి ప్రేక్షకులను ఆకట్టుకున్నారు.
సంధ్యారాణి ప్రతిభను గుర్తించిన ప్రభుత్వ సలహాదారు సుదర్శన్ రెడ్డి, మహమ్మద్ షబ్బీర్ అలీ, కలెక్టర్ సి.పి. సాయి చైతన్య, తెలంగాణ ఆగ్రో ఇండస్ట్రియల్ చైర్మన్ గడుగు గంగాధర్, గ్రంథాలయ చైర్మన్ మద్ది చంద్రకాంత్ రెడ్డి, సాంస్కృతిక కళాకారుడు అష్టా గంగాధర్ తదితరులు ఆమెను అభినందించారు.
పేదరికాన్ని అధిగమిస్తూ విద్యతో పాటు జానపద కళను కొనసాగిస్తూ ముందుకు సాగుతున్న గల్కట్వార్ సంధ్యారాణి ప్రస్థానం నేటి యువతకు స్ఫూర్తిదాయకమని స్థానికులు పేర్కొంటున్నారు. పట్టుదల, ప్రతిభ, కృషితో గ్రామీణ ప్రాంత యువత కూడా తమకంటూ ప్రత్యేక గుర్తింపు సాధించవచ్చని ఆమె ప్రయాణం చాటుతోంది.
