నవపక్షం, నారాయణపేట ప్రతినిధి:
నారాయణపేట మండలం సింగారం గ్రామంలో తెలంగాణ రైతు విజ్ఞాన కేంద్రం, నారాయణపేట సమన్వయకర్త డా. ఈటెల సత్యనారాయణ, జిల్లా వ్యవసాయ అధికారి సక్రియ నాయక్, వ్యవసాయ విస్తరణ అధికారి అనిల్ రైతుల పొలాలను సందర్శించి వరి, పత్తి, కంది పంటల పరిస్థితిని క్షేత్రస్థాయిలో పరిశీలించారు.
ఈ సందర్భంగా రైతులతో నేరుగా మాట్లాడి పంటల ప్రస్తుత పరిస్థితి, ఎరువుల వినియోగం, కలుపు నివారణ, తెగుళ్లు, చీడపీడల నియంత్రణ తదితర అంశాలపై అవగాహన కల్పిస్తూ శాస్త్రీయ వ్యవసాయ పద్ధతులపై పలు సూచనలు చేశారు.
వరి పంటలో సమతుల్య ఎరువుల వినియోగం
వరి పంటకు నత్రజని ఎరువులను ఒకేసారి అధిక మోతాదులో వినియోగించకుండా, పంట ఎదుగుదల దశలను అనుసరించి విడతల వారీగా అందించాలని అధికారులు సూచించారు. భాస్వరం, పొటాష్ ఎరువులను నేల పరిస్థితి, పంట అవసరాలకు అనుగుణంగా వినియోగించాలని తెలిపారు. పైరుకు అవసరమైన దశలో నత్రజని అందించడం ద్వారా మంచి పంట పెరుగుదలతో పాటు ఆశించిన దిగుబడి సాధించవచ్చని వివరించారు. అధిక మోతాదులో యూరియా వినియోగాన్ని నివారించాలని రైతులకు సూచించారు.
పత్తి పంట ప్రారంభ దశలో అవసరమైన ప్రాథమిక ఎరువులను అందించడంతో పాటు, పంట ఎదుగుదల దశను బట్టి నత్రజని, పొటాష్‌ను విడతల వారీగా అందించాలని అధికారులు సూచించారు. అధికంగా యూరియా వినియోగించడం వల్ల మొక్కల్లో అధిక వృక్ష పెరుగుదల ఏర్పడి, పూత మరియు కాయల ఏర్పాటుపై ప్రతికూల ప్రభావం చూపే అవకాశం ఉందని రైతులకు వివరించారు.
కంది పంటలో విల్ట్‌ (ఎండు తెగులు) నివారణ
కంది పంటను పరిశీలించిన అధికారులు కొన్ని పొలాల్లో విల్ట్‌ (ఎండు తెగులు) లక్షణాలను గుర్తించారు. వ్యాధి సోకిన మొక్కలను వెంటనే పొలం నుంచి తొలగించి నాశనం చేయాలని సూచించారు. పొలాల్లో నీరు నిల్వ ఉండకుండా తగిన డ్రైనేజీ సౌకర్యం కల్పించాలని, పంట మార్పిడి విధానాన్ని పాటించాలని తెలిపారు.
విత్తన శుద్ధి, జీవ నియంత్రణ పద్ధతులను అవలంబించడంతో పాటు, అవసరమైన సందర్భాల్లో వ్యవసాయ శాఖ సిఫారసు చేసిన శిలీంద్రనాశకాలను మాత్రమే ఉపయోగించడం ద్వారా విల్ట్‌ తెగులును సమర్థవంతంగా నియంత్రించవచ్చని వివరించారు.
కంది పంటలో సమగ్ర కలుపు యాజమాన్యం
కంది పంటలో ప్రారంభ దశ నుంచే కలుపు మొక్కలను సమర్థవంతంగా నియంత్రించాలని అధికారులు సూచించారు. పంట దశ, నేల స్వభావం, కలుపు మొక్కల రకాలను పరిగణనలోకి తీసుకుని సిఫారసు చేసిన కలుపు నివారణ మందులను లేబుల్‌పై సూచించిన మోతాదు, విధానం ప్రకారం మాత్రమే వినియోగించాలని తెలిపారు. అవసరమైన చోట అంతరకృషి, చేతి కలుపు మరియు సిఫారసు చేసిన హెర్బిసైడ్లను సమగ్ర కలుపు యాజమాన్యంలో భాగంగా వినియోగించాలని సూచించారు.
శాస్త్రీయ పద్ధతులతోనే పంటల యాజమాన్యం
ఈ సందర్భంగా తెలంగాణ రైతు విజ్ఞాన కేంద్రం, నారాయణపేట సమన్వయకర్త డా. ఈటెల సత్యనారాయణ మాట్లాడుతూ, రైతులు ఎరువులు, పురుగుమందులు, కలుపు నివారణ మందులను తమ ఇష్టానుసారం వినియోగించకుండా, పంట దశ, నేల పరిస్థితి మరియు శాస్త్రీయ సిఫారసుల ఆధారంగా ఉపయోగించాలని సూచించారు. పంటల్లో ఏవైనా సమస్యలు గుర్తించిన వెంటనే వ్యవసాయ శాఖ అధికారులను సంప్రదించి, సరైన యాజమాన్య పద్ధతులను పాటించాలని రైతులకు సూచించారు.
రైతుల పొలాలను క్షేత్రస్థాయిలోనే సందర్శించి పంటల పరిస్థితిని పరిశీలించడం, సమస్యలను గుర్తించడం, వాటికి శాస్త్రీయ పరిష్కారాలను సూచించడం ద్వారా తెలంగాణ రైతు విజ్ఞాన కేంద్రం, నారాయణపేట రైతులకు నిరంతరం సాంకేతిక సహకారం అందిస్తుందని అధికారులు తెలిపారు.
