నవపక్షం, దమ్మపేట, ఆగస్టు 15:
దమ్మపేట మండలం, దమ్మపేట గ్రామంలోని జనసేన దిమ్మ వద్ద 80వ స్వాతంత్ర్య దినోత్సవ వేడుకలను జనసేన పార్టీ ఆధ్వర్యంలో ఘనంగా నిర్వహించారు. జనసేన మండల అధ్యక్షులు అబ్దుల్ రెహమాన్ ఆధ్వర్యంలో నిర్వహించిన ఈ వేడుకలు దేశభక్తి ఉట్టిపడేలా వైభవంగా సాగాయి.
ఈ సందర్భంగా జనసేన నాయకులు జాతీయ జెండాను ఆవిష్కరించి, జాతీయ గీతాన్ని ఆలపించారు. అనంతరం దేశ స్వాతంత్ర్యం కోసం తమ ప్రాణాలను త్యాగం చేసిన స్వాతంత్ర్య సమరయోధులను స్మరించుకుని ఘన నివాళులు అర్పించారు.
ఈ సందర్భంగా నాయకులు మాట్లాడుతూ, స్వాతంత్ర్య సమరయోధుల త్యాగాలను స్ఫూర్తిగా తీసుకుని దేశ సమగ్రత, ఐక్యత, అభివృద్ధి కోసం ప్రతి ఒక్కరూ తమ వంతు బాధ్యతను నిర్వర్తించాలని పిలుపునిచ్చారు. యువత దేశ నిర్మాణంలో చురుకైన పాత్ర పోషించాలని, దేశభక్తి, క్రమశిక్షణతో ముందుకు సాగాలని ఆకాంక్షించారు.
వేడుకల్లో జనసేన వార్డు మెంబర్ సరిత, నాయకులు గోపిశెట్టి శ్యామ్, మల్ల శ్రీను, పోతిని మహేష్, చెన్నకేశవరావు, గుల్లా రాంబాబు, దాసరోజు రామారావు, రంజిత్, కొండపర్వ చిన్న తదితరులు పాల్గొన్నారు.
వీరితో పాటు జనసేన పార్టీ కార్యకర్తలు, వీర మహిళలు పెద్ద సంఖ్యలో ఉత్సాహంగా పాల్గొన్నారు. దేశభక్తి నినాదాలతో దమ్మపేటలో పండుగ వాతావరణం నెలకొంది.
ఈ సందర్భంగా ప్రజలందరికీ నాయకులు 80వ స్వాతంత్ర్య దినోత్సవ శుభాకాంక్షలు తెలిపారు.
