నవపక్షం, నాంపల్లి మండల ప్రతినిధి :
నాంపల్లి మండల కేంద్రం నుంచి కొండమల్లేపల్లి వరకు కొనసాగుతున్న రహదారి నిర్మాణ పనులను త్వరితగతిన పూర్తి చేయాలని కోరుతూ సామాజిక వేత్త కర్నాటి శ్రీహరి సోమవారం నాంపల్లి మండల ప్రజావాణిలో ఎంపీడీవో రామకృష్ణ శర్మకు వినతిపత్రం అందజేశారు.
రహదారి నిర్మాణ పనులు అసంపూర్తిగా ఉండటంతో ఈ మార్గంలో రాకపోకలు సాగించే ప్రజలు తీవ్ర ఇబ్బందులు ఎదుర్కొంటున్నారని శ్రీహరి తెలిపారు. రహదారిపై కంకర పరిచి పనులు పూర్తికాకపోవడంతో ద్విచక్ర వాహనదారులు, ఇతర వాహనదారులు ప్రమాదాలకు గురవుతున్నారని, ఇప్పటికే ఎంతోమంది గాయాలపాలయ్యారని ఆవేదన వ్యక్తం చేశారు.
విద్యార్థులు, ఉద్యోగులు, రైతులు, వ్యాపారులు, ప్రజలు ప్రతిరోజూ ఈ రహదారిపై రాకపోకలు సాగిస్తుంటారని, రహదారి అధ్వానంగా ఉండటంతో వాహనదారులు అనేక ఇబ్బందులు పడుతున్నారని పేర్కొన్నారు. దుమ్ము, కంకర కారణంగా ప్రజలకు ఇబ్బందులు కలుగుతున్నాయని తెలిపారు.
ప్రజల సమస్యను సంబంధిత అధికారుల దృష్టికి తీసుకెళ్లి రహదారి నిర్మాణ పనులను వెంటనే వేగవంతం చేసి పూర్తి చేయాలని ఎంపీడీవో రామకృష్ణ శర్మను కోరినట్లు శ్రీహరి తెలిపారు. ప్రజల భద్రత దృష్ట్యా పనులు పూర్తయ్యే వరకు అవసరమైన హెచ్చరిక బోర్డులు, భద్రతా చర్యలు చేపట్టాలని ఆయన విజ్ఞప్తి చేశారు.
