భద్రాద్రి కొత్తగూడెం, నవపక్షం ప్రతినిధి :
డాక్టర్ బి.ఆర్. అంబేద్కర్ ఓపెన్ యూనివర్సిటీ మొదటి సంవత్సరం ప్రవేశాలకు ఈ నెల 13వ తేదీ వరకు గడువు పొడిగించినట్లు శ్రీ రామచంద్ర ప్రభుత్వ ఆర్ట్స్ అండ్ సైన్స్ కళాశాల (అటానమస్) ప్రిన్సిపాల్ ప్రొఫెసర్ పద్మ, అంబేద్కర్ ఓపెన్ యూనివర్సిటీ కోఆర్డినేటర్ డాక్టర్ వెంకట్ తెలిపారు.
ఈ మేరకు గురువారం వారు సంయుక్త ప్రకటన విడుదల చేశారు. ఇంటర్ ద్వితీయ సంవత్సరం, ఓపెన్ ఇంటర్, డిప్లొమా, ఐటీఐ పూర్తి చేసిన విద్యార్థులు అంబేద్కర్ ఓపెన్ యూనివర్సిటీలో మొదటి సంవత్సరం ప్రవేశం పొందవచ్చని తెలిపారు.
కొయ్య, చెంచు వర్గాలకు చెందిన విద్యార్థులతో పాటు దివ్యాంగులకు ఎటువంటి ఫీజు చెల్లించాల్సిన అవసరం లేదని పేర్కొన్నారు. ఈ సదుపాయాన్ని అర్హులైన విద్యార్థులు వినియోగించుకోవాలని సూచించారు.
అదేవిధంగా ఇప్పటికే ద్వితీయ, తృతీయ సంవత్సరాల్లో చదువుతున్న విద్యార్థులు యూనివర్సిటీ ఫీజులను ఈ నెల 13వ తేదీలోగా చెల్లించాలని ప్రిన్సిపాల్ ప్రొఫెసర్ పద్మ, కోఆర్డినేటర్ డాక్టర్ వెంకట్ సూచించారు.
