నవపక్షం, వికారాబాద్ ప్రతినిధి :
మై భారత్ ఆధ్వర్యంలో పాతూరు గ్రామంలో శుక్రవారం గాంధీ జయంతి వేడుకలు ఘనంగా నిర్వహించారు. మహాత్మా గాంధీ జయంతి సందర్భంగా గ్రామ సర్పంచ్ దొడ్ల సంపత్ రెడ్డి, గ్రామ పంచాయతీ సెక్రెటరీ వెంకట్ రెడ్డి , మై భారత్ వాలంటీర్ సాయి వర్ధన్ గాంధీజీ చిత్రపటానికి పూలమాలలు వేసి ఆయన సేవలను స్మరించుకున్నారు.
ఈ సందర్భంగా మై భారత్ వాలంటీర్ సాయి వర్ధన్ మాట్లాడుతూ యువత మహాత్మా గాంధీని ఆదర్శంగా తీసుకుని ఆయన చూపిన సత్యం, అహింస మార్గంలో నడవాలని అన్నారు.
అనంతరం గ్రామ సర్పంచ్ దొడ్ల సంపత్ రెడ్డి, గ్రామ పంచాయతీ సెక్రెటరీ వెంకట్ రెడ్డి గ్రామ అభివృద్ధికి చేపడుతున్న వివిధ కార్యక్రమాల గురించి వివరించారు. గతంలో మహాత్మా గాంధీ జాతీయ గ్రామీణ ఉపాధి హామీ పథకం కింద 100 రోజుల ఉపాధి కల్పించగా, ప్రస్తుతం వి.బి.జి. రామ్.జి. కింద 125 రోజులకు ఉపాధి హామీ పొడిగించబడిందని తెలిపారు. గ్రామంలో వి.బి.జి. రామ్.జి. కింద 375 పనులు చేపట్టినట్లు వివరించారు. ఎల్‌ఈడీ లైట్ల ఏర్పాటు, ఇంకుడు గుంతలు, తడి-పొడి చెత్త నిర్వహణ, బోర్‌వెల్స్, సోలార్ ప్యానెల్స్, ఇందిరమ్మ ఇళ్లు, వర్మీ కంపోస్ట్ తదితర అభివృద్ధి కార్యక్రమాల గురించి వివరించారు.ఈ కార్యక్రమంలో సర్పంచ్ దొడ్ల సంపత్ రెడ్డి, గ్రామ పంచాయతీ సెక్రెటరీ వెంకట్ రెడ్డి, మై భారత్ వాలంటీర్ కైల సాయి వర్ధన్ రెడ్డి తదితరులు పాల్గొన్నారు.
