నవపక్షం, నారాయణపేట జిల్లా ప్రతినిధి :
పంచాయతీ కార్యదర్శులపై ప్రభుత్వం వరుసగా అదనపు బాధ్యతలు మోపుతూ తీవ్ర పనిభారానికి గురిచేస్తోందని తెలంగాణ రక్షణ సేన నారాయణపేట జిల్లా అధ్యక్షుడు గవి నోళ్ల శ్రీనివాస్ ఆవేదన వ్యక్తం చేశారు. గ్రామస్థాయిలో ప్రభుత్వానికి, ప్రజలకు మధ్య వారధిగా పనిచేస్తున్న పంచాయతీ కార్యదర్శులకు ఇప్పటికే రోజువారీ విధులతో పాటు జీపీడీపీ, జీ-సాప్‌ సర్వేలు, ఆన్‌లైన్‌ డేటా నమోదు, ఎస్‌ఐఆర్‌ బాధ్యతలు అప్పగించడంతో పని ఒత్తిడి తీవ్రంగా పెరిగిందన్నారు.
జీపీడీపీ, జీ-సాప్‌ సర్వేల కోసం సుమారు 20 పేజీల బుక్‌లెట్లలో వందలాది కాలమ్స్‌ను పూరించాల్సి వస్తోందని శ్రీనివాస్ తెలిపారు. ప్రతి కుటుంబం, వివిధ వర్గాల ప్రజల వివరాలతో పాటు వ్యవసాయ భూముల విస్తీర్ణం, 18 ఏళ్లు నిండిన ఓటర్లు, వృద్ధులు, దివ్యాంగులు, వితంతువులు, గర్భిణులు, బాలింతలు, ఆరు సంవత్సరాలలోపు పిల్లలు తదితర సమాచారాన్ని క్షేత్రస్థాయిలో సేకరించి నమోదు చేయాల్సి వస్తోందన్నారు. దీనికి తోడు సేకరించిన సమాచారాన్ని తక్షణమే ఆన్‌లైన్‌లో అప్‌లోడ్‌ చేయాలని ఉన్నతాధికారుల నుంచి ఒత్తిడి వస్తోందని పేర్కొన్నారు.
ఇక ఎస్‌ఐఆర్‌ (Special Intensive Revision)లో భాగంగా ఓటర్లకు నోటీసులు అందజేయడం, ఇంటింటికీ వెళ్లి ఓటర్ల వివరాలను వెరిఫికేషన్‌ చేయడం, అవసరమైన పత్రాలను పరిశీలించడం వంటి బాధ్యతలు కూడా పంచాయతీ కార్యదర్శులపైనే పడుతున్నాయని తెలిపారు.
అంగన్‌వాడీ, ఆశా కార్యకర్తలు, ఉపాధ్యాయులు, వైద్య సిబ్బంది తదితర ఫ్రంట్‌లైన్‌ సిబ్బంది నుంచి సేకరించాల్సిన సమాచారాన్ని కూడా చివరకు పంచాయతీ కార్యదర్శులే సమీకరించాల్సి వస్తోందని ఆయన ఆరోపించారు. తగిన సమయం ఇవ్వకుండా భారీ స్థాయిలో డేటా సేకరణ, ధ్రువీకరణ, ఆన్‌లైన్‌ నమోదు పనులను పూర్తి చేయాలని ఆదేశించడం వల్ల కార్యదర్శులు తీవ్ర మానసిక ఒత్తిడికి గురవుతున్నారని అన్నారు.
దీనికి తోడు రాత్రివేళల్లో జూమ్‌ మీటింగ్‌లు, టెలికాన్ఫరెన్స్‌లు, సమీక్షలు నిర్వహించడం, సెలవు రోజుల్లోనూ విధులకు సంబంధించిన ఆదేశాలు ఇవ్వడం వల్ల పంచాయతీ కార్యదర్శులు కుటుంబాలకు సమయం కేటాయించలేని పరిస్థితి ఏర్పడిందన్నారు.
ప్రభుత్వం వెంటనే పంచాయతీ కార్యదర్శులపై అదనపు పనిభారాన్ని తగ్గించాలని శ్రీనివాస్ డిమాండ్ చేశారు. ఇప్పటికే ఉన్న రోజువారీ విధులకు అదనంగా కొత్త బాధ్యతలు అప్పగించకుండా, అవసరమైన పనులకు ప్రత్యేక సిబ్బందిని కేటాయించాలని కోరారు. డేటా సేకరణకు తగిన గడువు ఇవ్వడంతో పాటు గ్రామాల విస్తీర్ణం, జనాభా, అందుబాటులో ఉన్న సిబ్బంది, రోజువారీ విధులను పరిగణనలోకి తీసుకుని వాస్తవికమైన టార్గెట్లు నిర్ణయించాలని విజ్ఞప్తి చేశారు.
వివిధ శాఖలకు సంబంధించిన సమాచారాన్ని ఆయా శాఖల సిబ్బందితోనే సేకరించేలా బాధ్యతలను విభజించాలని, ప్రతి పనినీ పంచాయతీ కార్యదర్శులపైనే మోపకుండా స్పష్టమైన మార్గదర్శకాలు జారీ చేయాలని ఆయన ప్రభుత్వాన్ని కోరారు.
“డేటా సేకరణ పేరుతో పంచాయతీ కార్యదర్శులపై అంతులేని పనిభారం మోపడం సరికాదు. ఒకే సమయంలో జీపీడీపీ, జీ-సాప్‌, ఎస్‌ఐఆర్‌ పనులు, ఓటర్లకు నోటీసులు, ఇంటింటి వెరిఫికేషన్‌, ఆన్‌లైన్‌ డేటా నమోదు వంటి అనేక బాధ్యతలు అప్పగిస్తే వారు ఏ పనిని సక్రమంగా చేయగలరు? ప్రభుత్వం క్షేత్రస్థాయి పరిస్థితులను అర్థం చేసుకుని పనిభారం తగ్గించి, అవసరమైన సిబ్బందిని నియమించి, ప్రతి పనికి తగిన గడువు ఇవ్వాలి” అని గవి నోళ్ల శ్రీనివాస్ కోరారు.
