నవపక్షం, నారాయణపేట జిల్లా ప్రతినిధి :
మక్తల్ నియోజకవర్గ కేంద్రంలో కొనసాగుతున్న పలు అభివృద్ధి, నిర్మాణ పనులను జిల్లా కలెక్టర్ ప్రియాంక శుక్రవారం పరిశీలించారు. పనుల పురోగతిని సంబంధిత అధికారులను అడిగి తెలుసుకుని, నాణ్యతా ప్రమాణాలతో పాటు నిర్దేశిత గడువులోగా పనులను పూర్తి చేయాలని ఆదేశించారు.
ముందుగా మక్తల్ మండలం గొల్లపల్లి సమీపంలో నిర్మిస్తున్న యంగ్ ఇండియా ఇంటిగ్రేటెడ్ రెసిడెన్షియల్ స్కూల్ నిర్మాణ పనులను కలెక్టర్ పరిశీలించారు. సుమారు 20 ఎకరాల విస్తీర్ణంలో రూ.250 కోట్ల అంచనా వ్యయంతో చేపడుతున్న ఈ ప్రాజెక్టు నిర్మాణ పురోగతిపై అధికారులను వివరాలు అడిగి తెలుసుకున్నారు.
అదే ప్రాంతంలో ఆర్టిఫిషియల్ విభాగానికి 9 ఎకరాలు, సెట్విన్‌కు 10 ఎకరాల 30 గుంటలు, ఏటీసీకి 1.5 ఎకరాలు, సెట్విన్ ట్రైనింగ్ సెంటర్‌కు 20 గుంటల స్థలాన్ని కేటాయించినట్లు అధికారులు కలెక్టర్‌కు వివరించారు.
అనంతరం మక్తల్‌లో కొనసాగుతున్న ఫైర్ స్టేషన్ నిర్మాణ పనులను కలెక్టర్ పరిశీలించారు. పనులను నాణ్యతా ప్రమాణాలతో వేగవంతంగా పూర్తి చేసి, ప్రజలకు అందుబాటులోకి తీసుకురావాలని అధికారులను ఆదేశించారు.
పన్నుల వసూళ్లలో జాప్యంపై కలెక్టర్ ఆగ్రహం
అనంతరం మక్తల్ మున్సిపల్ కార్యాలయాన్ని సందర్శించిన కలెక్టర్ పట్టణంలో ఇంటి పన్ను, నీటి పన్ను, ట్రేడ్ లైసెన్స్ ఫీజుల వసూళ్ల పరిస్థితిని సమీక్షించారు. పన్నుల వసూళ్లలో జాప్యం జరుగుతుండటంపై మున్సిపల్ కమిషనర్‌పై అసంతృప్తి వ్యక్తం చేశారు. ఆస్తి పన్ను బకాయిల వసూళ్లను వేగవంతం చేయాలని ఆదేశించారు.
పట్టణంలోని పలుచోట్ల చెత్త పేరుకుపోయిన విషయాన్ని గమనించిన కలెక్టర్ పారిశుద్ధ్య నిర్వహణపై అసంతృప్తి వ్యక్తం చేశారు. వెంటనే చెత్తను తొలగించి పట్టణ పారిశుద్ధ్యాన్ని మెరుగుపరచాలని అధికారులను ఆదేశించారు. చెత్త సేకరణ వాహనాలు నిర్దేశిత ప్రాంతాల్లో సక్రమంగా తిరుగుతున్నాయా లేదా అనే విషయాన్ని జీపీఎస్ ద్వారా నిరంతరం పర్యవేక్షించాలని సూచించారు.
మున్సిపల్ కార్యాలయంలో సిబ్బంది హాజరు పర్యవేక్షణకు బయోమెట్రిక్ హాజరు విధానాన్ని ఏర్పాటు చేయాలని కలెక్టర్ సూచించారు. మున్సిపాలిటీలోని వార్డు అధికారులు, మొత్తం వార్డుల సంఖ్య, ఇతర పరిపాలనా అంశాలపై అధికారులను వివరాలు అడిగి తెలుసుకున్నారు.
150 పడకల ప్రభుత్వ ఆస్పత్రి పనుల పరిశీలన
అనంతరం మక్తల్ సమీపంలోని 916/2, 917/2 సర్వే నంబర్లలోని సుమారు 10 ఎకరాల ప్రభుత్వ స్థలంలో రూ.35 కోట్ల వ్యయంతో నిర్మిస్తున్న 150 పడకల ప్రభుత్వ ఆస్పత్రి నిర్మాణ పనులను జిల్లా కలెక్టర్ పరిశీలించారు.
ఆస్పత్రి నిర్మాణానికి సంబంధించిన A, B, C, D బ్లాక్‌ల పనులు పూర్తయ్యాయని అధికారులు కలెక్టర్‌కు వివరించారు. మిగిలిన పనులను మార్చి నెలాఖరు నాటికి పూర్తి చేసి ఆస్పత్రిని ప్రారంభానికి సిద్ధం చేయాలని కలెక్టర్ ఆదేశించారు.
నిర్మాణ పనుల్లో నాణ్యతా ప్రమాణాలకు ఎట్టి పరిస్థితుల్లోనూ రాజీ పడకుండా, నిర్దేశిత గడువును తప్పనిసరిగా పాటించాలని అధికారులకు స్పష్టం చేశారు.
ఈ పర్యటనలో తహసీల్దార్ సతీష్ కుమార్, మున్సిపల్ చైర్‌పర్సన్ వాకిటి మానస, మున్సిపల్ కమిషనర్ రాజయ్య తదితరులు పాల్గొన్నారు.
