ఆల్ స్పోర్ట్స్ అసోసియేషన్లు, సీనియర్ క్రీడాకారులతో ఎమ్మెల్యే కూనంనేని సాంబశివరావు స్పోర్ట్స్ రివ్యూ మీటింగ్
కొత్తగూడెం నవ పక్షం :- ప్రతి నిధి :-నాగశివాజీ :-
కొత్తగూడెం నియోజకవర్గంలో క్రీడల అభివృద్ధికి మరింత ప్రాధాన్యత కల్పించి, క్రీడాకారులకు మెరుగైన మౌలిక వసతులు అందించేందుకు కృషి చేస్తామని కొత్తగూడెం నియోజకవర్గ ఎమ్మెల్యే కూనంనేని సాంబశివరావు అన్నారు.
శుక్రవారం ఎమ్మెల్యే క్యాంపు కార్యాలయంలో నియోజకవర్గంలోని వివిధ క్రీడా సంఘాల ప్రతినిధులు, సీనియర్ క్రీడాకారులు, కోచ్లతో స్పోర్ట్స్ రివ్యూ మీటింగ్ నిర్వహించారు. ఈ సమావేశంలో నియోజకవర్గంలో క్రీడల ప్రస్తుత పరిస్థితి, క్రీడాకారులు ఎదుర్కొంటున్న సమస్యలు, అందుబాటులో ఉన్న క్రీడా మైదానాలు, భవిష్యత్లో చేపట్టాల్సిన అభివృద్ధి కార్యక్రమాలపై సమగ్రంగా చర్చించారు.
ఈ సందర్భంగా బృందావనం ప్రాంతం సమీపంలో సుమారు 18 ఎకరాల విస్తీర్ణంలో సమగ్ర క్రీడా ప్రాంగణాన్ని ఏర్పాటు చేయడానికి కృషి చేయాలని సమావేశంలో ప్రధానంగా చర్చించారు. అథ్లెటిక్స్, ఫుట్బాల్, క్రికెట్, వాలీబాల్, కబడ్డీ తదితర క్రీడలకు అవసరమైన మౌలిక వసతులతో కూడిన స్పోర్ట్స్ కాంప్లెక్స్ ఏర్పాటుతో స్థానిక క్రీడాకారులకు ఎంతో ప్రయోజనం కలుగుతుందని క్రీడా సంఘాల ప్రతినిధులు ఎమ్మెల్యే దృష్టికి తీసుకువచ్చారు.
నియోజకవర్గంలోని ప్రతిభ కలిగిన క్రీడాకారులను గుర్తించి వారికి శిక్షణ, మౌలిక వసతులు, పోటీలకు అవసరమైన సహకారం అందించడం ద్వారా జాతీయ, అంతర్జాతీయ స్థాయిలో కొత్తగూడెం క్రీడాకారులు రాణించేలా చర్యలు తీసుకోవాల్సిన అవసరం ఉందని సమావేశంలో అభిప్రాయపడ్డారు.
క్రీడా మైదానాల అభివృద్ధి, కోచ్లకు అవసరమైన సౌకర్యాలు, క్రీడాకారులకు శిక్షణా వసతులు, వివిధ క్రీడా సంఘాల సమస్యలు తదితర అంశాలపై కూడా చర్చ జరిగింది.
ఈ సమావేశంలో జిల్లా యువజన క్రీడల అధికారి పరంధామా రెడ్డి, వాసిరెడ్డి మురళీ, మహీధర్, పుట్టా శంకరయ్య, డా. యుగేందర్ రెడ్డి, వాసిరెడ్డి నరేష్, ప్రేమ్, బావుసింగ్, వై.వి. వెంకటేశ్వరరావు, బాబ్జి, ఖాసీం, మాటపర్తి రమేష్, హనుమత్ రావు, చలపతి, ఉదయ్ తదితరులు, వివిధ క్రీడా సంఘాల ప్రతినిధులు, సీనియర్ క్రీడాకారులు మరియు కోచ్లు పాల్గొన్నారు.
క్రీడా ప్రాంగణం ఏర్పాటుతో కొత్తగూడెం క్రీడలకు కొత్త దిశ
18 ఎకరాల్లో సమగ్ర క్రీడా ప్రాంగణం ఏర్పాటు జరిగితే నియోజకవర్గంలోని యువతకు నాణ్యమైన శిక్షణా వసతులు అందుబాటులోకి రావడంతో పాటు, ప్రతిభావంతులైన క్రీడాకారులను రాష్ట్ర, జాతీయ స్థాయికి తీర్చిదిద్దేందుకు మరింత అవకాశం లభిస్తుందని క్రీడా సంఘాల ప్రతినిధులు తెలిపారు.
