నవపక్షం, వేములవాడ ప్రతినిధి :
శ్రీకృష్ణాష్టమి సందర్భంగా వేములవాడ న్యూ అర్బన్ కాలనీ ప్రాథమిక పాఠశాలలో శ్రీకృష్ణాష్టమి వేడుకలను ఘనంగా నిర్వహించారు. ఈ సందర్భంగా విద్యార్థులు శ్రీకృష్ణుడు, గోపికల వేషధారణలో అలరించి అందరినీ ఆకట్టుకున్నారు. అనంతరం ఉట్టి కొట్టే కార్యక్రమాన్ని ఉత్సాహంగా నిర్వహించారు.
ఈ సందర్భంగా పాఠశాల ప్రధానోపాధ్యాయుడు విక్కుర్తి లక్ష్మీనారాయణ మాట్లాడుతూ, హిందూ పురాణాలలో విష్ణుమూర్తి ఎనిమిదవ అవతారమైన శ్రీకృష్ణుని విశిష్టత, ఆయన తత్వం, జీవిత పాఠాలు ఎంతో ప్రాధాన్యత కలిగినవని అన్నారు. సమాజానికి మార్గదర్శకత్వం చేసే విధంగా శ్రీకృష్ణుడు అందించిన సందేశాలు మానవాళికి ఎల్లప్పుడూ ఆదర్శనీయమని పేర్కొన్నారు.
కురుక్షేత్ర రణరంగంలో అర్జునుడికి కర్తవ్యాన్ని బోధిస్తూ, అధర్మాన్ని అణచి ధర్మాన్ని నిలబెట్టేందుకు శ్రీకృష్ణుడు చేసిన గీతోపదేశం మానవాళికి జీవనవేదం అని తెలిపారు. రాధాకృష్ణుల తత్వం ద్వారా ఎలాంటి ఆశలు లేని నిస్వార్థమైన ప్రేమను శ్రీకృష్ణుడు లోకానికి చాటారని అన్నారు.
అలాగే వర్గ, కుల, మత భేదాలకు అతీతంగా సుధాముడు వంటి పేద స్నేహితుడిని సైతం గుండెలకు హత్తుకుని సమానత్వాన్ని బోధించారని తెలిపారు. పుట్టుకతోనే కంసుని చెరసాలలో కష్టాలు ప్రారంభమైనప్పటికీ, జీవితాంతం ఎన్నో సవాళ్లను ఎదుర్కొంటూ ఎల్లప్పుడూ చిరునవ్వుతో, ప్రశాంతతతో సమస్యలను ఎదుర్కోవడం శ్రీకృష్ణుని ప్రత్యేకత అని ప్రధానోపాధ్యాయుడు విక్కుర్తి లక్ష్మీనారాయణ పేర్కొన్నారు.
విద్యార్థుల్లో భారతీయ సంస్కృతి, సంప్రదాయాల పట్ల అవగాహన కల్పించేందుకు ఇలాంటి పండుగలను పాఠశాలలో నిర్వహించడం ఎంతో ఉపయోగకరమని తెలిపారు.
ఈ కార్యక్రమంలో ఉపాధ్యాయులు దుర్శేటి లక్ష్మీనారాయణ, కంకెల్కార్ మోహన్, అంగన్వాడీ ఉపాధ్యాయురాలు లిక్కిడి మంజుల, పులి శారద, విద్యార్థులు తదితరులు పాల్గొన్నారు.
