నవపక్షం, బోడుప్పల్ ప్రతినిధి:
బీఆర్ఎస్ పార్టీకి చెందిన ఎమ్మెల్యేలు, ఎమ్మెల్సీలను అసెంబ్లీకి హాజరుకాకుండా పోలీసు బలగాలతో అడ్డుకున్న కాంగ్రెస్ ప్రభుత్వ ప్రజాస్వామ్య వ్యతిరేక, నిరంకుశ వైఖరిని నిరసిస్తూ బోడుప్పల్ బీఆర్ఎస్ పార్టీ కార్యాలయం ఎదుట నిరసన కార్యక్రమం నిర్వహించారు.
ఈ కార్యక్రమంలో బీఆర్ఎస్ నాయకురాలు, మాజీ డిప్యూటీ మేయర్ కొత్త లక్ష్మి రవి గౌడ్ పాల్గొని ప్రభుత్వ తీరును తీవ్రంగా ఖండించారు. ప్రజలచే ఎన్నుకోబడిన ప్రజాప్రతినిధులను అసెంబ్లీకి వెళ్లకుండా అడ్డుకోవడం ప్రజాస్వామ్య స్ఫూర్తికి విరుద్ధమని ఆమె అన్నారు.
ప్రజల సమస్యలను శాసనసభలో ప్రస్తావించడం ప్రజాప్రతినిధుల హక్కు అని, ఆ హక్కును అడ్డుకునే ఏ చర్యనైనా బీఆర్ఎస్ పార్టీ తీవ్రంగా ప్రతిఘటిస్తుందని స్పష్టం చేశారు. అధికార అహంకారంతో ప్రజాస్వామ్య హక్కులను కాలరాయడం ఏ ప్రభుత్వానికీ శోభించదని విమర్శించారు.
అధికారం శాశ్వతం కాదని, ప్రజలే అంతిమ నిర్ణేతలని పేర్కొన్న ఆమె.. ప్రజల హక్కులు, ప్రజాస్వామ్య పరిరక్షణ కోసం బీఆర్ఎస్ శ్రేణులు ఐక్యంగా పోరాడాలని పిలుపునిచ్చారు.
ప్రజల గొంతుకను అణచివేయాలని చూసే ప్రతి ప్రయత్నాన్ని బీఆర్ఎస్ పార్టీ ప్రజాక్షేత్రంలో ఎదుర్కొంటుందని, ప్రజాస్వామ్య పరిరక్షణ కోసం తమ పోరాటం నిరంతరం కొనసాగుతుందని ఆమె స్పష్టం చేశారు.
