దళితుల ఆత్మగౌరవాన్ని కించపరిస్తే సహించేది లేదు — ప్రభుత్వ విప్, నకిరేకల్ ఎమ్మెల్యే వేముల వీరేశం

నవపక్షం, హైదరాబాద్, తెలంగాణ స్టేట్ బ్యూరో :

దళితుల ఆత్మగౌరవాన్ని దెబ్బతీసే చర్యలను ఖండిస్తూ హైదరాబాద్‌లో దళిత సంఘాల ఆధ్వర్యంలో నిర్వహించిన నిరసన కార్యక్రమంలో ప్రభుత్వ విప్, నకిరేకల్ ఎమ్మెల్యే వేముల వీరేశం పాల్గొన్నారు.

ఈ సందర్భంగా ఆయన మాట్లాడుతూ, దళితుల గౌరవాన్ని కించపరిచే వ్యాఖ్యలు లేదా చర్యలు ఏ రూపంలో ఉన్నా ఖండించాల్సిన అవసరం ఉందన్నారు. అసెంబ్లీ స్పీకర్‌పై అనుచిత వ్యాఖ్యలు చేశారన్న ఆరోపణలు, దళితుల నిరసన సందర్భంగా అవమానకరంగా వ్యవహరించారన్న ఆరోపణలపై సంబంధిత వర్గాలు స్పష్టత ఇవ్వాలని కోరారు.

రాజ్యాంగం కల్పించిన సమానత్వం, సామాజిక న్యాయం, ఆత్మగౌరవాన్ని ప్రతి ఒక్కరూ గౌరవించాల్సిన బాధ్యత ఉందన్నారు. దళితుల హక్కులు, గౌరవం కోసం ప్రజాస్వామ్య, రాజ్యాంగబద్ధ మార్గాల్లో పోరాటం కొనసాగుతుందని వేముల వీరేశం స్పష్టం చేశారు