నవపక్షం, పిట్లం ప్రతినిధి:
ప్రభుత్వ పాఠశాలల్లో పదో తరగతి పరీక్షల్లో ఉత్తమ ప్రతిభ కనబరిచిన 23 మంది విద్యార్థులను మెమెంటోలు, నగదు ప్రోత్సాహకాలతో ఘనంగా సత్కరించారు. కీ. శే. నవాబ్ మహిపాల్ గౌడ్ జ్ఞాపకార్థం స్వాతంత్ర్య దినోత్సవాన్ని పురస్కరించుకుని ఈ కార్యక్రమాన్ని నిర్వహించారు.
పిట్లం మండల కేంద్రంలోని ప్రభుత్వ పాఠశాలల్లో చదువుతూ పదో తరగతిలో అత్యుత్తమ ఫలితాలు సాధించిన విద్యార్థులను ఎంపిక చేసి ఈ ప్రోత్సాహకాలను అందజేశారు. విద్యార్థుల్లో చదువుపై ఆసక్తిని పెంపొందించడంతో పాటు, ప్రభుత్వ పాఠశాలల్లో విద్యనభ్యసిస్తున్న ప్రతిభావంతులను ప్రోత్సహించాలనే ఉద్దేశంతో ఈ కార్యక్రమాన్ని చేపట్టినట్లు నిర్వాహకులు తెలిపారు.
ఈ సందర్భంగా నిర్వాహకులు మాట్లాడుతూ విద్యార్థులు ప్రస్తుత విజయాలతో సంతృప్తి చెందకుండా ఉన్నత లక్ష్యాలను నిర్దేశించుకుని భవిష్యత్తులో మరింత ఉన్నత స్థాయికి ఎదగాలని ఆకాంక్షించారు. విద్యార్థుల ప్రతిభను గుర్తించి ప్రోత్సహించడం ద్వారా వారి ఆత్మవిశ్వాసం మరింత పెరుగుతుందని పేర్కొన్నారు.
ఈ కార్యక్రమానికి కీ. శే. మహిపాల్ గౌడ్ కుటుంబ సభ్యులు శివకుమార్ గౌడ్, సుదర్శన్ గౌడ్, శ్రీనివాస్ గౌడ్ సహకారం అందించారు. ప్రభుత్వ పాఠశాలల విద్యార్థులను ప్రోత్సహిస్తూ చేపట్టిన ఈ కార్యక్రమాన్ని పలువురు అభినందించారు
