నవపక్షం, చౌటుప్పల్ మండల ప్రతినిధి:
వెయ్యి రోజుల కాంగ్రెస్ పాలనలో ప్రజలకు ఇచ్చిన 420 హామీలను అమలు చేయకుండా ప్రభుత్వం ప్రజలను మోసం చేస్తోందని ఆరోపిస్తూ బీఆర్ఎస్ పార్టీ ఆధ్వర్యంలో మునుగోడులో భారీ ధర్నా నిర్వహించారు.
మునుగోడు నియోజకవర్గంలో నిర్వహించిన ఈ నిరసన కార్యక్రమానికి మాజీ ఎమ్మెల్యే కూసుకుంట్ల ప్రభాకర్ రెడ్డి నాయకత్వం వహించారు. వంద కార్లు, వందలాది బైకులు, వేలాది మంది బీఆర్ఎస్ కార్యకర్తలు తరలివచ్చి కాంగ్రెస్ ప్రభుత్వ పాలనకు వ్యతిరేకంగా నినాదాలు చేశారు.
ఈ సందర్భంగా కూసుకుంట్ల ప్రభాకర్ రెడ్డి మాట్లాడుతూ కాంగ్రెస్ ప్రభుత్వం ఎన్నికల సమయంలో ప్రజలకు ఇచ్చిన 420 హామీలను వెంటనే అమలు చేయాలని డిమాండ్ చేశారు. హామీలను అమలు చేయకుండా కాలయాపన చేస్తూ ప్రజలను మభ్యపెడుతున్నారని విమర్శించారు. ప్రజల సమస్యలపై బీఆర్ఎస్ పార్టీ నిరంతరం పోరాటం చేస్తుందని అన్నారు.
ప్రజలకు ఇచ్చిన హామీలను అమలు చేసి, ప్రజలకు న్యాయం చేయాలని ఆయన డిమాండ్ చేశారు. కాంగ్రెస్ ప్రభుత్వ వైఫల్యాలు, ప్రజా సమస్యలపై బీఆర్ఎస్ ఆధ్వర్యంలో ఉద్యమాలను మరింత ఉధృతం చేస్తామని తెలిపారు.
ఈ కార్యక్రమంలో మాజీ మున్సిపల్ చైర్మన్లు, కౌన్సిలర్లు, వివిధ గ్రామాల సర్పంచులు, వార్డు సభ్యులు, గ్రామ శాఖ అధ్యక్షులు, వార్డు అధ్యక్షులు, బీఆర్ఎస్ నాయకులు, కార్యకర్తలు అధిక సంఖ్యలో పాల్గొన్నారు.
