నవపక్షం, కేతేపల్లి: మండలంలోని బొప్పారం గ్రామ మాజీ సర్పంచ్, కాంగ్రెస్ పార్టీ సీనియర్ నాయకుడు సుంకరి కేశయ్య అంతిమయాత్ర తీవ్ర విషాదం, భావోద్వేగాల మధ్య కొనసాగింది. కేశయ్య మృతితో బొప్పారం గ్రామం విషాదంలో మునిగిపోయింది. గ్రామస్తులు పెద్ద సంఖ్యలో అంతిమయాత్రలో పాల్గొని తమ అభిమాన నాయకుడికి కన్నీటి వీడ్కోలు పలికారు.
గ్రామంలో చిన్నా పెద్దా అనే తేడా లేకుండా ప్రతి ఒక్కరినీ ఆప్యాయంగా పలకరిస్తూ, ఎవరికైనా కష్టం వచ్చినప్పుడు నేనున్నానంటూ అండగా నిలిచే కేశయ్య ఇక లేరనే విషయం గ్రామస్తులను తీవ్రంగా కలచివేసింది. గ్రామ ప్రజలతో ఆయనకు ఉన్న ఆత్మీయ అనుబంధం అంతిమయాత్ర సందర్భంగా మరోసారి స్పష్టమైంది.
కేశయ్య అంతిమయాత్రకు గ్రామంలోని అన్ని వర్గాల ప్రజలు పెద్ద ఎత్తున తరలివచ్చారు. గ్రామం మొత్తం ఏకమై ఆయన వెంట నడుస్తూ చివరి వీడ్కోలు పలికింది. యువత, మహిళలు, వృద్ధులు, చిన్నారులు సైతం అంతిమయాత్రలో పాల్గొని తమ అభిమానాన్ని చాటుకున్నారు. పలువురు గ్రామస్తులు కేశయ్యతో తమకున్న అనుబంధాన్ని గుర్తు చేసుకుంటూ భావోద్వేగానికి గురయ్యారు.
అంతిమయాత్రలో కళాకారులు కేశయ్యతో తమకున్న అనుబంధాన్ని గుర్తుచేసుకుంటూ ఆయన సేవలను స్మరిస్తూ పాటలు పాడారు. దీంతో అక్కడి వాతావరణం మరింత విషాదభరితంగా మారింది. కేశయ్యను గుర్తు చేసుకుంటూ పలువురు గ్రామస్తులు కన్నీటిపర్యంతమయ్యారు. “నీలాంటి మంచి మనిషిని గ్రామం కోల్పోయింది” అంటూ పలువురు ఆవేదన వ్యక్తం చేశారు.
ఈ సందర్భంగా కేశయ్య ఫ్లెక్సీలోని చిత్రపటానికి బొప్పారం ఉపసర్పంచ్ కోట్ల బాబు, మాజీ ఉపసర్పంచ్ శేషు గౌడ్, రావుల రాజు తదితరులు పాలాభిషేకం చేసి ఘనంగా నివాళులర్పించారు. కేశయ్య చిత్రపటానికి పూలమాలలు వేసి ఆయనకు అశ్రునివాళి అర్పించారు.
కేశయ్య గ్రామ సర్పంచ్గా పనిచేసిన సమయంలో ప్రజలకు అందుబాటులో ఉంటూ గ్రామ అభివృద్ధికి తన వంతు కృషి చేశారని పలువురు నాయకులు, గ్రామస్తులు గుర్తుచేసుకున్నారు. రాజకీయాలకు అతీతంగా ప్రతి ఒక్కరితో స్నేహపూర్వకంగా మెలిగే ఆయన స్వభావాన్ని కొనియాడారు. ఆపదలో ఉన్న వారికి అండగా నిలవడం, గ్రామ ప్రజల సమస్యలను తన సమస్యలుగా భావించి పరిష్కారానికి కృషి చేయడం కేశయ్య ప్రత్యేకత అని పేర్కొన్నారు.
అంతిమయాత్రలో పాల్గొన్న నాయకులు, గ్రామస్తులు కేశయ్య సేవలను స్మరించుకుంటూ ఆయన కుటుంబ సభ్యులకు ప్రగాఢ సానుభూతి తెలిపారు. కేశయ్య మృతి గ్రామానికి, కాంగ్రెస్ పార్టీకి తీరని లోటని పేర్కొన్నారు. ఆయన ఆత్మకు శాంతి చేకూరాలని, కుటుంబ సభ్యులకు మనోధైర్యం కలగాలని ప్రార్థించారు.
కేశయ్యకు గ్రామ ప్రజలు అందించిన ఈ కన్నీటి వీడ్కోలు ఆయనపై ప్రజలకు ఉన్న అభిమానం, ఆత్మీయతకు నిదర్శనంగా నిలిచింది.
