నవపక్షం, నెల్లిమర్ల ప్రతినిధి:
ప్రజా సమస్యలను నేరుగా తెలుసుకుని వాటికి పరిష్కారం చూపించడమే లక్ష్యంగా నెల్లిమర్ల ఎమ్మెల్యే లోకం నాగ మాధవి ముంజేరు క్యాంపు కార్యాలయంలో ప్రజా దర్బార్ నిర్వహించారు. నియోజకవర్గంలోని వివిధ ప్రాంతాల నుంచి వచ్చిన ప్రజల నుంచి అర్జీలు స్వీకరించి, వారి సమస్యలను స్వయంగా అడిగి తెలుసుకున్నారు.
రెవెన్యూ, ఇళ్ల స్థలాలు, విద్యుత్ సమస్యలు తదితర అంశాలకు సంబంధించి ప్రజలు సమర్పించిన వినతులను ఎమ్మెల్యే శ్రద్ధగా విని, సమస్యల తీవ్రతను తెలుసుకున్నారు. పలువురు అర్జీదారుల సమస్యలపై సంబంధిత అధికారులతో వెంటనే ఫోన్లో మాట్లాడి, ప్రాధాన్యత క్రమంలో సమస్యలను త్వరితగతిన పరిష్కరించాలని ఆదేశించారు.
ఈ సందర్భంగా ఎమ్మెల్యే లోకం నాగ మాధవి మాట్లాడుతూ, “ప్రజల సమస్యలను వినడమే కాదు.. వాటికి పరిష్కారం చూపించడమే మా కూటమి ప్రభుత్వ లక్ష్యం. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ నాయకత్వంలో ప్రజలకు జవాబుదారీతనంతో కూడిన పాలన అందిస్తూ, ప్రతి అర్జీకి న్యాయం జరిగేలా నిరంతరం కృషి చేస్తాను” అని తెలిపారు.
చంద్రబాబు నాయుడు అభివృద్ధి దిశ, పవన్ కళ్యాణ్ ప్రజా సేవా స్ఫూర్తితో నెల్లిమర్ల నియోజకవర్గంలో ప్రజా సమస్యలకు పరిష్కారమే లక్ష్యంగా ముందుకు సాగుతున్నామని ఎమ్మెల్యే స్పష్టం చేశారు.
ప్రజలకు ఎల్లప్పుడూ అందుబాటులో ఉంటూ, వారి సమస్యలను నేరుగా తెలుసుకుని పరిష్కారం కోసం అధికార యంత్రాంగాన్ని కదిలిస్తున్న ఎమ్మెల్యే లోకం నాగ మాధవి తీరుపై ప్రజలు హర్షం వ్యక్తం చేశారు.
