జుక్కల్ మండల సరిహద్దు ప్రాంతాల్లో చిరుతపులుల సంచారం — ప్రజలు, వాహనదారులు అప్రమత్తంగా ఉండాలి

నవపక్షం, జుక్కల్ ప్రతినిధి, ఆగస్టు 29 :

కామారెడ్డి జిల్లా జుక్కల్ మండల పరిధిలోని సరిహద్దు ప్రాంతాల్లో వన్యప్రాణులు, ముఖ్యంగా చిరుతపులుల సంచారం ఉన్నట్లు సమాచారం అందుతున్న నేపథ్యంలో ప్రజలు, రైతులు, వాహనదారులు అత్యంత అప్రమత్తంగా ఉండాలని అధికారులు సూచించారు. దోస్పల్లి, సోపూర్, డోంగావ్, బంగార్‌పల్లి గ్రామాల చుట్టుపక్కల ఉన్న అటవీ ప్రాంతాలు, గ్రామ శివారు రహదారుల్లో చిరుతల సంచారం ఉన్నట్లు స్థానికుల ద్వారా సమాచారం అందుతోంది. ముఖ్యంగా కర్ణాటక రాష్ట్రానికి రాకపోకలు సాగించే వాహనదారులు, ఈ మార్గాల గుండా ప్రయాణించే ప్రజలు రాత్రి వేళల్లో మరింత జాగ్రత్తగా ఉండాలని సూచించారు. దోస్పల్లి, సోపూర్, డోంగావ్, బంగార్‌పల్లి మీదుగా కర్ణాటక వైపు వెళ్లే ద్విచక్ర వాహనదారులు రాత్రి సమయాల్లో ఒంటరిగా ప్రయాణించకుండా జాగ్రత్తలు తీసుకోవాలి. వ్యవసాయ క్షేత్రాలు, పశువుల పాకల వద్ద ఉండే రైతులు రాత్రి వేళల్లో పొలాలకు వెళ్లాల్సి వచ్చినప్పుడు టార్చ్‌లైట్లు, అవసరమైన భద్రతా సామగ్రిని వెంట ఉంచుకోవాలి. గ్రామాల శివారు ప్రాంతాల్లోని అటవీ మార్గాలు, నిర్మానుష్య ప్రదేశాల్లో వాహనాలను నిలిపి ఎక్కువసేపు ఉండకూడదు. చిరుత లేదా ఇతర వన్యప్రాణులు కనిపించినప్పుడు వాటి దగ్గరకు వెళ్లడం, వెంబడించడం, ఫోటోలు లేదా వీడియోలు తీసేందుకు ప్రయత్నించడం చేయకూడదు. ఎక్కడైనా చిరుత సంచారం కనిపించినా, పశువులపై దాడి జరిగినా వెంటనే అటవీశాఖ అధికారులకు సమాచారం అందించాలి. ప్రజలు అప్రమత్తంగా ఉంటూ, వన్యప్రాణులను రెచ్చగొట్టకుండా, అధికారుల సూచనలు పాటించాలని కోరారు.