కోటలో ఘనంగా ప్రపంచ శాంతి దినోత్సవం.. శాంతి సందేశంతో విద్యార్థుల ర్యాలీ

నవపక్షం, గూడూరు ప్రతినిధి :

కోట మండలం కోటలో ప్రపంచ శాంతి దినోత్సవాన్ని పురస్కరించుకుని విద్యానగర్ లోని ఫోనిక్స్ ఇంగ్లీష్ మీడియం పాఠశాల విద్యార్థులు, అధ్యాపకులు శాంతి ర్యాలీ నిర్వహించారు.మండల కార్యాలయ ప్రాంగణం నుంచి ప్రారంభమైన ర్యాలీలో విద్యార్థులు శాంతి,సోదరభావం, సహనానికి సంబంధించిన సందేశాలతో ప్రజలకు అవగాహన కల్పించారు. ఈ సందర్భంగా విద్యార్థులు మాట్లాడుతూ ప్రపంచ దేశాలన్నీ శాంతి మార్గంలో పయనించాలని, యుద్ధాలు,హింసకు తావులేకుండా పరస్పర స్నేహభావం,సహనం, సోదరభావంతో ముందుకు సాగాలని ఆకాంక్షించారు. భవిష్యత్ తరాలకు ప్రశాంతమైన, సురక్షితమైన సమాజాన్ని అందించాల్సిన బాధ్యత ప్రతి ఒక్కరిపై ఉందని పేర్కొన్నారు.

అనంతరం కోట పోలీస్ స్టేషన్‌లో విద్యార్థులకు ప్రపంచ శాంతిపై అవగాహన కార్యక్రమం నిర్వహించారు.ఏఎస్ఐ చేతుల మీదుగా శాంతి కపోతాన్ని విడుదల చేసి శాంతి సందేశాన్ని చాటారు.ఈ సందర్భంగా పోలీస్ సిబ్బంది విద్యార్థులకు శాంతి, సోదరభావం, సామాజిక బాధ్యతపై అవగాహన కల్పించారు.కార్యక్రమంలో పాఠశాల విద్యార్థులు, అధ్యాపకులు,పోలీస్ సిబ్బంది తదితరులు పాల్గొన్నారు.