నవపక్షం ,నాంపల్లి ప్రతినిధి :
నాంపల్లి మండలం ఒంటెద్దుగూడెం గ్రామానికి చెందిన సహజ వ్యవసాయ రైతు మద్దూరి రాధాకృష్ణ వ్యవసాయ క్షేత్రాన్ని నల్లగొండ జిల్లా వ్యవసాయ అధికారి ఉల్లోజు వినోద్ కుమార్ నేడు క్షేత్రస్థాయిలో సందర్శించారు. ఈ కార్యక్రమంలో మునుగోడు సహాయ వ్యవసాయ సంచాలకులు (ADA), నాంపల్లి మండల వ్యవసాయ అధికారి (MAO), నాంపల్లి మండల వ్యవసాయ విస్తరణ అధికారులు (AEOలు) పాల్గొన్నారు.
ఈ సందర్భంగా రైతు మద్దూరి రాధాకృష్ణ అనుసరిస్తున్న సహజ వ్యవసాయ పద్ధతులను జిల్లా వ్యవసాయ అధికారి క్షేత్రస్థాయిలో పరిశీలించారు. పంటల సాగులో అమలు చేస్తున్న విధానాలపై రైతుతో వివరంగా చర్చించారు.
సహజ వ్యవసాయంలో భాగంగా రసాయన ఎరువులు, పురుగుమందుల వినియోగాన్ని తగ్గించి, స్థానికంగా లభించే సహజ వనరులను వినియోగించడం ద్వారా సాగు ఖర్చులను తగ్గించుకోవచ్చని అధికారులు తెలిపారు. దీంతో పాటు నేల ఆరోగ్యం మెరుగుపడటంతో పాటు నేలలోని సూక్ష్మజీవుల కార్యకలాపాలు పెరిగి, నేల సారవంతత మెరుగుపడుతుందని వివరించారు.
దీర్ఘకాలంలో నేల ఉత్పాదకతను కాపాడుతూ పర్యావరణ పరిరక్షణకు దోహదపడే స్థిరమైన వ్యవసాయ విధానంగా సహజ వ్యవసాయానికి ఎంతో ప్రాధాన్యత ఉందని అధికారులు పేర్కొన్నారు.
రైతులు సహజ వ్యవసాయ పద్ధతులపై అవగాహన పెంపొందించుకొని, తమ ప్రాంతానికి అనుకూలమైన పద్ధతులను దశలవారీగా అమలు చేయాలని సూచించారు. సహజ వ్యవసాయాన్ని ప్రోత్సహించడం ద్వారా సాగు ఖర్చులను తగ్గించడంతో పాటు నేల ఆరోగ్యాన్ని కాపాడుతూ స్థిరమైన వ్యవసాయాన్ని అభివృద్ధి చేయవచ్చని తెలిపారు.
